• November 19th, 2019
Login / Register

A tindi uuthigwa wamumwayina u pewe omagano



Victoria Kaapanda

ONGWEDIVA –Omukiintu gumwe mOshitopolwa shaShana okwa ninga oshinima oshikumithi sho a shunitha ko omakwatho gokuyambidhidha uuthigwa wamumwayinagona mboka oye te u tekula.
Omandaaha goshiwike shika aasihenda oyali ya fala omakwatho komukunda Opoto popepi nOngwediva, kaanona mboka taya hokololwa kaantu yopomukunda gwawo kutya oye li moluhepo, kawu na esilo shimpwiyu noya pumbwa omakwatho.

Ashike yinagona Ndeweenda Thomas, ngoka oye tewu tekula sho a mono aantu mboka ya eta omakwatho, okwa tindi anuwa oshoka epangelo otali uvu kutya oku na naanona taya mono iihuna, e ta li hulitha po oku mu pa iimaliwa mbyoka hayi pewa oothigwa kepangelo.  

Sho a ka talwa kuundingosho e ye andola a kunde aayenda nokutaamba ko omagano gaanona –omanga owala inaa thika megumbo –Tomas ngoka a li ta monika a idhenga miikopi, okwa tameke ta igidha kutya oolye mboka ya kalela egumbo lye noya hala shike.

Sho a li a fatululilwa nawa, okwa ti ye ina hala nando okutaamba sha tashi zi kuyo, ina hala nokupulakena, onkene naya ze mo megumbo lye manga ine ya tila omeya.

“Ngame ohandi mono iimaliwa yopenzela yuunona wandje, olye a ti otawu mono iihuna? Omwa hala ashike epangelo li hulithe po okupa uunona wandje iimaliwa yawo, omwa hala wu ka lye peni, indeni, zii mo megumbo lyandje ine hala kupulakena, omwa hala okukengelelela ndje nani,” Thomas tatidha aayenda a geya.

Aachiina ye li yaali Chen Huang oshowo Liu Zhao oya li ya shuna nomakumbatha, iikulya, iikutu oshowo iidhanitho kumwe yongushu  N$8 000 sho yali ya ka talele po uunona mboka ya li ya lombwelwa kutya otawu mono iihuna.

Huang okwa li a lombwele Kundana ta ti okwa li a lombwelwa kukuume ke gumwe kutya momukunda gwawo omu na egumbo li na uunona uushona hawu ilele wo wene, ano kawu na ngoka hewu sile oshimpwiyu.

“Okwa li a pula ndje ngele otandi vulu oku wu yambidhidha naashoka ndi na po.  Onda li nda eta ohenda oshoka onda li nda lombwelwa kutya ngoka omukuluntu kuyakwawo okuna omimvo omugoyi ye oye nee ha sile oshimpwiyu aamwayina. Gumwe gomimvo hamano no nonkelo yomimvo ine,” Huang ta ti ngaaka.
Omushiinda gumwe ngoka edhina lye li shiwike kuKundana okwa li a yelitha kutya ngoka a lopota oshinima shoka oku li mondjila oshoka uunona owa fa ashike hawu zi mo owo awike megumbo, oshoka yinagona ngoka e na oku ya sila oshimpwiyu ke na nayo.

Ta hokolola ta ti oha meneka ashike ongula ta ka nwa omangandja kuukamba, ye ta galuka kegumbo mokati kamawusiku. Ta ti ethimbo lyokuteleka ke li na nando, uunona owu li mehalakano nayi.
“Esiku ndyoka ngele twa tula mo omeya mombiga ga gwana ohatu wu ithana wu ye wulye. Meme guunona mboka okwa hula ko oomvula ndatu dha pita, mumwayinagona ngoka oye nee a li a pewa a kale nawo megumbo,” Omushinda ta yelitha ngaaka.

Okamonamati hoka ta ka sile oshimpwiyu aamwayina oka li ka lombwele Kundana taka ti oshiwike ohashi vulu okupita po inaya mona yinagona, oshoka megumbo ohe ya mo ashike uusiku, nethimbo ndyoka oya kotha nale.

“Ongula onene sho tatu yi kosikola ohatu mu thigi a kotha ihe oha ti inatu mu pendula oshoka otatu piyaganeke oomposi dhe. Okamwameme kokankelo, ohandi ke ka pitika kosikola yoshikunino oshoka kape na ngu ta kala mo nako megumbo,” okanona osho ka ti ngaaka.

Ta ka hokolola kutya ethimbo limwe ohaya ka lya oonyandi noondunga ngele ya zi kosikola ihe kape na sha shokupaka po.

Kundana sho a li a pula kutya aasihenda mboka omagano otaye ga fala peni sho taya shuna nago konima sho ga tindwa, Zhao okwa ti ota ye ke ga gandja po ashike kosikola yimwe yoothigwa.t


Staff Reporter
2019-10-10 07:50:53 1 months ago

Be the first to post a comment...

You might also like...