• January 21st, 2019
Login / Register

Aafuko moshiponga shehauto mesiku lyohango



■  Kefas Shipi Elago

ONGWEDIVA – Ohango yimwe mOmusati oya piyaganekwa sho ohauto ndjoka ya li ya humbata aafuko ya kandoma. Nonande aafuko yo yene kaya li ya ehama unene, moshiponga moka omwa hulithile omuntu gumwe. 


Otaku hokololwa oshiponga shika sha ningilwa mopata onene, pokati kOshakati nOkahao komatango gwOlyomakaya ga za ko. 


Pamushangwahokololo ngoka gwa li gwa gandja komugandjimulombo gwopolisi moshitopolwa shaMusati Warrant Officer Anna Kunga, osheenditho sholudhi lwoMercedes Benz sholwaala lwoshisiliveli shonomola N282378SH shoka sha li mondjila onene tashi zi kuuzilo sha thinda muuninginino osha li sha topa egulu lyokonima lyokolulyo e tashi thigi po pate no kukondama.


Mosheenditho muka omwa li aafuko yaali mboka pawuyelele wa zi mopolisi yaMusati tawu hokolola kutya omufuko gwomumati okwa li a ka tala omufuko gwe gwomukadhona esiku etiyali lyohango yi na okuya kegumbo lyaandjawo yomumati. Ashike etyapulo ndika olya li lya yiwa moshipala koshiponga shika oshoka mbaka yaali otaku hokololwa kutya oya li ya falwa koshipangelo hoka ya li ya taambelwa moombete.


Omunamimvo 53 Beata Iiyambo gwomomukunda Etunda mOkahao oku li a kanithila mo omwenyo moshiponga shika, naakwanezimo ye oya tseyithilwa nale.


Omuhingi gwoshihawuto Tobias Kayone Natangwe ngoka a za momukunda Omuthitu gwaLwani ye okwa hupa moshiponga muka.


Oshihawuto osha li sha humbata aantu kumwe yahamano moka taku hokololwa kutya yaali oye li monkalo ombwiinayi moshipangelo shepangelo mOshakati.


Aafuko mboka ya li moshiponga pethimbo twa li moonkundathana na Sergeant Anna Kunga oya li nale ya lalekwa mo moshipangelo.


Kunga ota kumagidha aahingi opo ya kale aluhe haya tala omatayiyela giiyenditho yawo ngele oge li tuu monkalo ombwaanawa omanga inaya idhenga momalweendo.


“Olundji aahingi mboka haya kala nokuhinga piituthi yoohango ohaya kala ya longitha iikolitha onkene otandi indile opo kehe gumwe ta ka kala konima yoshihingitho pethimbo ndika a kale kokule nomalovu opo ashike tu yande iiponga”, Kunga ta ti.


Okwa ti aahingi wo naya ikaleke kokule nokusikulufa iihawuto poohango nosho wo okuumba oondjembo niitopitha yilwe oshoka osha nika oshiponga naotashi vulu okushitula enyanyu oluhodhi.


Kunga ta holola kutya mongashiingeyi oshitopolwa shaMusati oshi li sha ndhindhilika omwaalu gwiiponga iyali moka mwa kanena omwenyo gwomuntu gumwe momwedhi Desemba.


Staff Reporter
2018-12-21 10:12:10 1 months ago

Be the first to post a comment...

You might also like...