• November 19th, 2019
Login / Register

Aafuthi ya faalela ongendjo yongerki yaShakati



Victoria Kaapanda

ONGWEDIVA - Ongendjo yongushu yooN$200 000, ndjoka ya ninigi oomvula 46 mongerki ya-ELCIN moShakati oya yakwa mo oshiwike sha zi ko.

Omusita Erasmus Nangongo okwa li a lombwele onzonkundaneki ndjika ta ti ongendjo ndjoka oye yi dhimbulula momasiku 26 Juli, ano Etitano lya zi ko, ndyoka kwali esiku lyefumiviko lya nakusa gumwe noya li ya pumbwa okudhenga ongendjo okuya komayendo ngaashi hashi ningwa.

“Omulumentu ngoka a li a ka dhenga ongendjo okwa thikile ashike ta hili elyenge, nelalakano ngeno lyokudhenga ongendjo. A yeluthe omeho a tale mombanda omu na ashike elyenge lya mangelwa ko ihe ongendjo kayi mo” Nangongo ta ti ngaaka.

Nangongo ta ti oshe mu kumitha noonkondo oshoka ina uva nale ongendjo yongeriki ya yakwa, noshi li onkundana ompe kukehe gumwe e shi uvu.

“Ongendjo ndjoka otwa ihula oku yi longitha mOsondaha yomasiku 21 Juli. Ongeleka ndjika oya dhingolokwa komagumbo ogendji noge li popepi lela ashike kape na nando ogumwe a uva ongendjo ndjoka tayi tono”, Nangongo ta yelitha.

Ta gwedha po ta ti  osha yela kutya ongendjo ndjoka inayi yakwa mo komuntu gumwe nenge kaantu yaali ihe oye na okukala oyendji  oshoka ongendjo onene yo ondhigu lela.

Nangongo ta ti  hasho oshikando shotango ongeleka ndjoka tayi yakwa. Mo2015 oya li ya ponokelwa koombudhi sho dha li dha yaka mo ookompiuta, omaviinyu, niikwayo oyindji.

Mo 2017  oya li ya yakwa natango omambako gooradio. Nuumvo pehulilo lyaFebuluali oombudhi odha li dha ponokele ongeleka natango sho dha kutha mo ookompiuta dhomoshinyanga.
Omasiku sho ga li 13 gomwedhi gwa yi aafuthi oya li ya pitile mekende lyegumbo lyongeleka, nokuyaka mo okompiuta yopeke, no-tv yomuzizimbe omanga omusita e li megumbo ashike ina uva sha nonande ka li a kotha.

Omupopiliko nomugandjimulombo mopolisi moshitopolwa shaShana Sergeant Frieda Shikole okwa ti otaya indile moshigwana opo kehe ngoka e na uuyelele nenge a mono aantu taya landitha ongendjo ya kale ya lopotela opolisi yopopepi.

“Unene ngaa mboka haya longo mpoka hapu landwa  nenge hapu landithwa iitenda yomaludhi naya kambadhale oku shi lopota. Ongendjo ndjoka oya longwa moshingoli shongushu lela,  sho osho ngiika sha hili aafuthi ye yi yake mo, noya li ya landwa kondje yoshilongo oomvula dhonalenale”, Shikole ta ti ngaaka.


Staff Reporter
2019-08-02 08:24:13 3 months ago

Be the first to post a comment...

You might also like...