• September 20th, 2020
Login / Register

Aagundjuka otaya keme 'okulunga itapula'



WINDHOEK- Ongundu yaagundjuka oya yi momunyanyo gwopambili taya pula aniwa omukuluntu gwoombonge dhoAnti-Corruption Commission (ACC) Paulus Noa a kale a thiga po ombwelewa meendelelo ngaashi tashi vulika oshoka okwa ndopa oku kala a manga mboka ye na olunyala mokudhengela ondhi peho miipotha oyindji ya yooloka, mbyoka aya yugu oshilongo oombiliona noomiliona.

Aanyanya-magulu mboka ya kwatelwa komesho kaagundjuka naakomesho mehangano lyoAffirmative Repositioning (AR) oya pula Noa a kale e ya pa omushangwa gwa pama tagu hokolola kutya omolwashike mboka ye na mo olunyala miimaliwa mbyoka ya longitha pa mbambo inaya mangwa ya tulwe konima yekumba oshoka ngashingeyi oyeli ashike ya manguluka no nande oye shiwike nawa.

Mbaka oyali ya ngundumanene oombonge dhaACC mpoka ya lesha omushangwa gwawo ngoka ya totha mo iimaliwa mbyoka yali ya longithwa pa mbambo noshowo ya longithwa kashili paayuuki ihe mboka yeshi ningi ina ya ungaungwa nayo.

Ongundu ndjoka yali ya pandeka noonkondo, oya pula Noa a kale a thiga po ombelewa ndjoka taya ti okwa fa naye woo e na mo olunyala miiya mbyoka.

Omushangwa ngoka gwa leshwa kuDimbulukweni Nauyoma okwa ti aniwa moshilongo omuna iipotha oyindji mbyoka Noa a li e na oku kala a konakona opo mboka taya fekelwa ya kale ya pulwa, ashike okwa mwena owala.

Nauyoma okwa hokolola kutya yimwe po yomiipotha mbyoka ongaashi  oomiliona omathele gahamano ngoka ga kana moombonge dhoGIPF,  oomilliona omilongo N$36  mbyoka ya futwa aakalelipo yopaveta ya kondjithe oshipotha shoGenocide mboka yali yeli mo UK, N$5,5 billiona dhoka dhali dha longithwa ehala lyokupungula omahooli, oombiliona N$7 dhoka  dhali dha longithwa Xaris Energy noshowo iikwawo oyindji yindji.

Mwaambyoka woo ya tothwa iimaliwa mbyoka ya futwa oominista oonkulu mbali naaNamibia ooyakwawo shi na sha nokugandja uuthemba wokuyuga oohi moshilongo.

Mboka oyali ya hokololwa kutya oya futwa iimaliwa ya pita poomiliona N$150 ya tula moondjato dhawo opo ya gandje uuthemba kaayuli yoohi aakwiilongo mboka ya kala noku yuga oohi moNamibia.
Ashike Noa okwa yamukula kengathithi ndyoka kutya shoka lya ningi okweshi tambula ko noonkondo adhihe na otaka shanga noku yamukula kwaashoka sha pulwa. “Omwa ningwa nawa sho mwa ulike kutya omuna oshilongo komutima mokukondjitha okulunga iitapula ashike ngashingeyi otandi ka kutha okathimbo mokukonaakona mbyoka ya tothwa mo e te yamukula shili mondjila noshuuka,” osho a hokolola ngaaka omanga ta menye mo a tala mengathithi.

Noa okwali woo a totha mo kutya iipotha yimwe mbyoka ya popiwa kaagundjuka ngaashi GIPF kayi shi iipotha yoACC ashike oyo polisi ihe okwa pandula aagundjuka sho ya tula mo ekemo lyawo na ota ka yamukula ngaashi shu uka noshili mondjila.


Loide Jason
2019-12-11 08:48:09 9 months ago

Be the first to post a comment...