• December 11th, 2019
Login / Register

Aakulupe oyo ya itumba mErongo…Aagundjuka oya li taya monika kolusindo pomahala gokuhogolola


ARANDIS –  Moshitopolwa shokomunkulofuta shErongo aantu omayovi oya li ya mbombolokele kiitaasi yokuhogolola, ashike nando oyendji ya yohogolola, yamwepo oya li wo inaaya hogolola konima sho ya li ye ya nuukalata uukulu mboka ihaawu longithwa we. Aakulupe oyendji oya li wo ya monika pomahala gokuhogololela. Sophia Elago, ngoka a hogolola oshikando shotango okwa li gumwe gwomaantu yotango mboka ya li ya hogolola moWalvis Bay. “Onda nyakukwa sho nda hogolola oshikando shotango notandi ka kala tandi hogolola wo monahiya,” osho a li a lombwele oshikundaneki oshimwayina naashika shoNew Era ngaaka.

Ashike nando ongawo Simon Petrus ka li u uvite nawa oshoka ka li ta vulu okuhogolola oshoka okwa kanitha okakalata ke okape. “Inandi mona ethimbo lyokuningulula okakalata okape nonda li nda luka otandi vulu okuhogolola nokakalata kandje okakulu,” ta ti ngaaka. Ta ti natango ka li a vula okuhogolola momahogololo gowina ngoka ga li ko momasiku 13 Novemba oshoka okwa li niilonga mefuta na opo ashike a ndjakile komutunda ongula yEtiyali.

Aakokele yomondoolopa yaSwakopmund Mike Scott naReni Oberpoieler oya lombwele New Era kutya oyu uvite uuntsa okukala Aanamibia ya kutha ombinga mehogololo kehe oshoka omawi gawo oge na oshilonga.
Oye wete sha simana kAanamibia ayehe mboka ya adha ya hogolole, kutya nee oye li kongundu yini yopolitika oshoka uuthemba wawo okuhogololola pu ningwe elunduluko osho wo ehumokomeho. Omuwiliki gomahogololo koHentis Bay Rachel /Nases okwa ti omahogololo oga ya komeho pwaa na omukweshe.
“Aakulupe oyo ya kala oyendji okuza ongula sho ya tameke okuya momukweyo potundi 06h00. Aagundjuka oya li aashona lela ashike otu na etimaumbwile kutya otaye ke ya sho ethimbo tali ende lyu uka komatango,” ta ti ngaaka.

Erongo olyi na aantu 20 772 ya ishangitha pomaishangitho ga gwedhwa po ya hogolole, moka aantu 9 151 ya li yi ishangitha oshikando shotango.
“Swakopmund oyi na aantu oyendji mboka ya ishangitha ya hogolole oshikando shotango, yi na aantu 3 252. Walvis Bay Urban oyi na aayishangithi 1 207 noWalvis Bay Rural yi na 1563,” /Nases ta ti ngaaka.


Eveline de Klerk
2019-11-28 08:26:43 13 days ago

Be the first to post a comment...