• May 24th, 2019
Login / Register

Aakwaita ya haluthwa kedhengo lyaakwashigwana


WINDHOEK-Uuministeli wEtanga Lyegameno, owi ikanyuna edhengo lyaakwashigwana kiilyo yalyo ndyoka lya hokololwa sho anuwa ya kala nokuthangagula noshowo okudhengagula aakwashigwana moWindhoek uule wiiwike iyali ya piti.
Aakalimo yomoVenduka uunene tuu womomalukanda ngaashi, Havana, Ombili, Hakahana nOkuryangava oya lombwele Kunduna kutya ehuliloshiwike lyOpaasa , moka ya dhenge aantu momapaandaanda omanga ya li taya patolola.
Aakwaita oya li ya pulwa ya patolole omapandaanda komupresidente gwoshilongo ehulilo lyomumvo gwa zi ko.

Ashike omulombo ngoka gwa pitithwa kuColonel Petrus Shilumbu ngoka e li omupopiliko guuministeli mboka ogwa hokolola kutya yo inaya gandja nande uuthemba kaakwaita mboka taya patolola okudhenga aakwashigwana onkene oya kumwa noonkondo komathano gaakwashigwana ngoka ge li komalungula taga ulike nkene aantu ya dhengwa.
“Tse natse otwa haluthwa koshiningwanima shoka shaakwaita mboka ya dhenga aantu mw akwatelwa naakiintu, onkene, inatu gandja uuthemba kaakwaita mboka na katu shi shi kutya oye li taya dhenge aantu,osho Shilumbu a ikanyuna pehala lyuuministeli mboka.

Shilumbu okwa hokolola kutya omayihumbato ngoka gaakwaita koshigwana itaga tambulwa ko nokupitikwa onkene uuministeli ngashingeyi otawu ka ninga onkambadhala opo wu konaakone oshinima shoka. Naamboka aniwa taya ka monika ya longa iilonga mbyoka otaya ka ungaungwa nayo kompango yomikalo miilonga.
Kundana okwa li a hokololelwa komukwashigwana gumwe ngoka a li a nyanyala nkene aakwaita mbaka taya dhenge omuhingi gwotaxi  sho aniwa a londeka omufalelwa ngoka ke li mepaya . 

“Oshingwanima shika osha halutha ndje. Aakwaita mbaka oya dhenga omuntu nguka e to ngwangwana kutya omu li ngaa moshilongo shi na ombili,? Osho omutaliyiho nguka a hokolola kutya shika osha ningilwa molukanda lwOmbili moKatutura mOvenduka pethimbo lyapaasa.

Ashike ngele owa ende momalukanda ngoka oshikundathanwa noshihokololwa onkene ashike aantu ya kumwa komayihumbato gaakwaita kaakwashigwana.

Ihe Shilumbu okwa kwashilipaleke kutya etanga lyegameno olya kondokidhwa koompango nomalandulathano onkene otaya longo shiikololela koompango dhoka dhili po oku longa naakwashigwana .

Ngoka woo gumwe gwomwaamboka ya dhengwa ketanga lyegameno omutoolinkundana omukiintu gwedhina Luise Mwanyangapo ngoka aniwa a thikama pehala lyontumba mondjila ye yokuya kegumbo koGreenwell okuza koLudwigsdorf. Aniwa nguka okwa pitike kuume ke koFreedomland  nokwa tokola opo a ka lande okakunwa ke hoka ta ka nwa kegumbo .
Aniwa okwa mono ashike engungo lyaakwaita tali ya dhenge noongonyo sigo okuya moshipangelo shaKatoolika moka e li a taambelwa moombete sho a dhengwa sha pitilila.


Loide Jason
2019-05-03 13:31:25 21 days ago

Be the first to post a comment...