• October 29th, 2020
Login / Register

Aanafalama ya pewa uundjatha wokumbwinda



Victoria Kaapanda

OSHAKATI - Aanafalama yokoshikandjohogololo Okatyali oya pewa omagano guundjatha wokwiigamena oku sa omeya kuNgoloneya gwoshitopolwa shaShana Elia Irimari Etitau lyoshiwike shika.

Aanafalama mboka haya taaguluka omulonga ngoka gwe ya kondekela kombinga yimwe momukunda Oniiwe, oya li ya penduka ye li menyanyu sho ya li ya pewa uundjatha woku ya gamena okusa omeya, uuna oshiponga sha haloka.

Ngoloneya gwoshitopolwa shaShana Elia Irimari okwa ti, uupyakadhi mbuka ohawu holoka kehe omvula nomakwatho ngoka haga gandjwa ogopokathimbo ashike.

“Otwa thaneke ngeno pehala mpaka pu tungwe ondama onene nenge pu tungwe omulonga okukwathela aanafaalama okutaaguluka. Onda inekela ngele shoka sha longwa otashi kala oshihwepo shi vulithe omakwatho haga gandjwa kehe omvula,” Irimari ta ti ngaaka.

Irimari okwa popi ta ti onkambadhala ndjoka ya ningi oyokugamena oomwenyo dhaanafaalama. Ngoloneya ota indile moshigwana kehe ngoka e na shoka ta vulu okugandja kaanafaalama kombinga yokwiikwathala pethimbo lyomeya e shi gandje poombelewa dhaNgoloneya mOshakati.

Irimari okwa li wo a gandja omalongo nkene aanafaalama ye na okulongitha uundjatha mboka. Ta ti uundjakete itawu kala tawu longithwa kehe ethimbo, ihe otawu kala tawu longithwa uuna pwa holoka oshiponga nenge pe na oshinima sha endelela.

Okwa li wo a kumagidha aanafaalama ya ikaleke kokule nomangandja uuna taya ka longitha okambawutu, oshoka otashi vulu oku eta iiponga.

Kansela gwoshikandjohogololo shaKatyali Joseph Mupetami okwa ti oku uvite ombili sho ngoloneya a thika opo a tale nomeho uupyakadhi aanafalama yomoshindjohogololo she nkene taya mono iihuna.
Mupetami okwa li a hokolola kutya uupyakadhi mboka kawu shi nando uupe, nomakwatho ngoka haya pewa kehe omvula oga pumbwa okuhulilwathwa po, yo ya yambidhidhwe naashoka tashi kandula po omukundu gwaaluhe ngaashi naanaa ethaneko lyontopa ndyoka lyapopiwa kungoloneya.

“Omeya ngaka oga ya muule, oge na oomita dha pita pu ine. Ohatu longitha omataagulukitho okuya kombinga ndjiya yomeya opo tu faalele aanafaalama mboka ye li kombinga ndjiya yomeya omakwatho agehe ya pumbwa,” Mupetami ta popi ngaaka.

Kambindja Nangolo omunahambo okwa ti okuuvite ya gamenwa paife.  Ta ti kwaamboka kaye shi okuyoga op ena uundjatha mboka tawu ya kwathele uuna ya gwila momeya.

Ta ti ohaya longitha ashike omapokolo ngele taya hingi okawato. Okwa pula moshigwana ta ti kwaamboka taya vulu oku ya yambidhidha, oya pumbwa natango ekwatho lyiiti mbyoka hayi longithwa okushinga okawato oshoka omapokolo ohageya longitha nuudhigu.  


Staff Reporter
2020-01-24 08:18:22 9 months ago

Be the first to post a comment...

You might also like...