• July 13th, 2020
Login / Register

Aanandjaba itaya iyutha koondjindikila dhoCovid-19 – mwene gwomukunda


Mwene gwomukunda Onandjaba-C moshikandjohogololo shaKalongo Daniel Nakweenda okwa indile opo aakuluntu noshowo aavali ya kale ya sa oshimpwiyu kutya aanona yawo otaya iyutha koompango nomalandulathano ngoka ga tulwa po mokukondjitha omukithi gwoCovid-19.
Nakweenda okwa hokolola kutya okwa li a haluthwa kengathithi lyaantu unene aagundjuka mboka ya li ya gongala poshituthi shohango shoka sha li momukunda gwe ehulilo shiwike ndyoka lya piti.

“Oshili aantu itaya iyutha koompango noondjindikila ndhoka dha tulwa po onkene shoka otashi kumitha notashi tililtha oshoka moshilongo omu na natango iipotha yombuto mbyoka tayi tumbulwa,” osho a hokolola ngaaka.

Okwa ti aakuluntu naya ninge oonkambadhala dha kola nodhuuka opo aanona yawo mboka taya hokana noshowo taya hokanwa ya kale ya iyutha komalombwelo gepangelo oshoka epangelo otali kondjitha nokusa oshimpwiyu kutya aantu mboka oya gamenwa.
“Atusheni out shi shi kutya omukithi nguka otagu taandele tagu endelele, na ngele itatu iyutha komalombwelo onkene ngaa tatu ka iyadha tu na iipotha oyindji oshoka aantu inaya hala okulongela kumwe nepangelo,” osho a hokolola ngaaka mongodhi sho a dhengelwa kuKundana.
Ta yambidhidha omapyopyo ga mwene gwomukunda kansela Makana Iipinge okwa ti kutya naye okwa haluka komayihumbato gaakwashigwana mboka ta ti kutya aantu oye wete unene ya manguluka ihe otaya dhimbwa kutya omukithi ngoka natango otagu tsikile nokukwata aantu muuyuni mwa kwatelwa woo aaNamibia.

Iipinge okwa tsikile ko tati ngashingeyi aayunganeki yiituthi unene ngaa anyasha ohaya panda ashike okwiinyanyudha etaya taaguluka ooompango nomalandulathano ngoka ga tulwa po kepangelo mokukondjitha omukithi ngoka.
Omukuluntu gwopolisi moshitopolwa shoka Titus Shikongo naye woo okwa indile aakwashigwana ya iyuthe koompango naamboka itaya iyutha koompango naya kale ya lopotwa kopolisi meendelelo.

“Kehe omukwashigwana a taaguluka oompango dhoka na lopotwe kopolisi meendelelo ngaashi tashi vulika. Onkee aantu naya tseye kutya opolisi itayi ya lwitha ihe oyeli po ashike mokukaleka po elandulathano nooveta,” osho shjikongo a hokolola ngaaka.
Ngashingeyi ominista yuuhaku nuundjolowele  Kalumbi Shangula  okwa popi kutya moshilongo omuna Iipotha iipe  mbyoka ya lopotwa moshilongo ngashingeyi ayihe oya za koshilongo shopuushiinda South Afrika sho aantu mboka ya galukile moshilongo yali ya kalekwa mookamba dho kwiikalela ya konaakonwa komasiku ga hugunina.
Ngashingeyi aakiintu yaali naalumentu yatatu oyeli ya kondekwa mookamba dhokwiikalela sho yali ya monikwa ombuto ndjoka.
Gumwe gwomaantu mboka shiikololela kuShangula okuli omuhingi gwomaloli ngoka ali a kala mookamba dhokwiikalekelwa uule womasiku geli 1.

“Konima yomasiku ngoka omulumentu ngoka gwo 47 okwali a tokola okwiiyakamo mookamba dhoka ya iyaka mo nomuhingi omukwawo. Oyali yayi omalukanda ngoka mondoolopa ya WalvisBay na ngashingeyi oyali ya mangwa po nokugalulilwa mookamba dhomoshipangelo shepangelo moka ngashingeyi eli a ikalekelwa oshoka okwa monikwa ombuto,” osho sha hokololwa kuShangula ngaaka.
Ashike Shangula okwa i woo a kumagidha aakwashigwana mboka ye li mookamba ya iyuthe koompango nomalandulathano opo oshilongo shi lwithe ombuto ndjika ngaashi naanaa shi na okukala.


Loide Jason
2020-05-27 09:27:22 1 months ago

Be the first to post a comment...