• March 28th, 2020
Login / Register

Aanawa ya pewa uuthemba womahala gawo


Victoria Kaapanda

ONGWEDIVA-Aakalimo yomolukanda Onawa, mboka ya li ya tembudhwa kEemwandi moshitopolwa shaShakati omumvo gwa yi oya pewa oonzapo dhuuthemba, okukwalishilipaleka kutya omahala ngoka ogawo, kOmuprima gwoshilongo Saara Kuugongelwa-Amadhila. 

Kuugongelwa okwa li wo a ende pamwe noominista oonkwawo Peya Mushelenga oshowo Utoni Nujoma.
“Oonzapo tandi gandja nena mpaka, otadhi kwashilipaleke kutya omahala ngoka aakalimo yali ya pewa oshali kElelo lyondoolopa yaShakati ogawo noye na paife uuthemba okutunga nokuhunitha komeho omahala gewo ngaashi ya hala,” Amadhila ta ti ngaaka.

Ta ti aakalimo mboka kaaye na iiyemo oshowo ye na iiyemo iishona ngashiingeyi oye na uuthemba okulongitha omahala gawo okuninga oongeshefa opo ya mone iiyemo, nokugandja oompito dhokuthigululathana omahala kaakwanezimo oshowo okutunga omagumbo gawo pamikalo ndhoka ya hala.
Amadhila okwa ti okwandhindhilike natango omalelo goondoolopa ngaashi Ovenduka noGobabis ge na ondungethaneko okugandja omahala kaakalimo yawo. Ta ti ota indile natango omalelondoolopa omakwawo moshilongo ga landule moonkatu dha fa dhika.

Nonando omahala ngoka ga gandjwa oge li 328, mboka ya pewa uuthemba manga oye li ashike 40, omanga ye li 288 taya ka pewa muule wethimbo efupu lyoomwedhi mbali tadhi landula.
Ngoloneya gwoshitopolwa shaShana Elia Irimari okwa ti shino sha longwa kElelo lyondoolopa yaShakati oshi shi okupandulwa noonkondo oshoka oonkalo dhaamboka kaaye na iiyemo nenge ye na iiyemo iishona odha yambulwapo.

Irimari ta ti otashi hokitha noshi li mondjila sho ooyene yomahala ya pewa uuthemba womahala gawo, wo wa gamenwa.

Ta popi ta ti omawupyakadhi gokulongekedha omahala  ge li hwepo goongeshefa oshowo aakalimo onge ngaa taga tsikile okuya iilonga yehumokomeho lyondoolopa komeho.

“Nosheendo shetu showina opamwe naanambelewa yokombelewa yomuPrima petameko lyomwedhi nguka okwa li twa dhimbulula omawupyakadhi ga taalela aakalimo yetu mboka haya gumwa kefundja. Omalundululo ogapumbwa okuningilwa aakalimo yomomudhingoloko gwaShakati,” Irimari ta popi ngaaka.
Okwa li twe ya po nedhilaadhilo okutembudha aakalimo haya kala momahala gomeya e taya tutilwa komitunda, omanga Elelondoolopa tali eta po ethaneko lya opala kombinga yomahala haga udha omeya.
 


Staff Reporter
2020-03-19 07:59:21 9 days ago

Be the first to post a comment...