• December 11th, 2019
Login / Register

Aaniilonga yaChoppies ya holola omadhilaadhilo gawo


Victoria Kaapanda

ONGWEDIVA - Aaniilonga yositola onene yedhina Choppies mOngwediva  moshitopolwa shaShana oya ningi omahololodhilaadhilo sho taya indile omulandu gu lundululwe.
Aaniilonga oya li ya ningi omunyanyo gwawo mOngwediva  ohela ethimbo lyongula. Ositola ndjoka hayi longo okuza Omaandaha sigo Osoondaha okwa li ya patulula omiyelo dhayo lwotango omumvo gwa yi muApilili.
Ongundu yaaniilonga ndjoka okwa li ya gandja omushangwa gomanyenyeto gwawo komukuluntu gwoositola dhoChoppies moshitopolwa shaShana Sajin Peethambaran.
Momushangwa gwawo oya li ya indile uuthemba wawo wu simanekwe noku uva omanyenyeto gawo.
Oya li ya fatulula kutya yo kaye na uupyakadhi wokulundululilwa kiitopolwa yilwe , ashike naya kale haya lombwelwa ku na ethimbo opo ya kala ya ilongekidha, tashi pitile momikalo  dha ukilila nodhi li mondjila.
Gumwe gwomaaniilonga ngoka edhina lye lyi shiwike kuKundana okwa ti uuthembo wawo nawu simanekwe.
Ohaya kala natango ye na iinakugwanitha yilwe, moshitopolwa moka ye li, ihe ohaya haluka ashike taya lundululilwa koondolopa dhilwe inaaye shi lombwelwa.
“Thimbo limwe ohandi hiti osikola. Ndjoka yi li ashike moshitopolwa moka kwa li tandi longele, nena oto mono ashike wa lundululwa, ngoye to thigi po osikola yoye niimaliwa yoye tayi kana oshoka ito vulu okutinda iilonga,” Omuniilonga ta ti ngaaka.
Oya gwedha po taya ti yamwe oye na uunona hawu yi kosikola. Oye na okukala ya lombwelwa kuyele opo ya ninge omalunduluko naakuluntusikola nenge ya konge omahala mpoka taya thigi uunona wawo.
Aaniilonga oya li wo ya indile ondjambi yawo yokomwedhi yi gwedhelwe noopelesenta 100.
Peethambaran okwa li a taaamba ko omushangwa ngoka ashike ina popya nayo nando osha.


Staff Reporter
2019-11-14 09:12:16 27 days ago

Be the first to post a comment...