• September 26th, 2020
Login / Register

Aaniilonga yoClean Master ya hala oondjambi dhawo dhi ihwa po


Aaniilonga yehangano lyokuopaleka tali ithanwa Clean Masters, oya ti oya hala oondjambi dhawo dhi ihwa po, ngaashi ya uvanekelwa okuza esiku lyotango lyawo ya kutwa miilonga.
Aaniilonga itaaya popiwa komadhina medhina lyegameno lyawo nuutile okukanitha iilonga yawo, oya ti, kaye uvite ombili oshoka inaya mona oondjambi dhawo dhokomwedhi dhi ihwa po omwedhi gwa yi.

“Otwa li twa mono  N$2 500 oku za koSocial secutity, onga ondjambi, okwiisila oshimpwiyu pethimbo ndika lyomukithi gwoCovid-19. Shoka osha geyitha aahona, aniwa kehe ngoka a mona oshimaliwa shoka ota nanwa iimaliwa mbyoka uule woomwedhi ndatu dha lambathana,” gumwe gwomaaniilonga ta ti ngaaka.
Aaniilonga taya nyenyeta kutya iimaliwa mbyoka haya mono komwedhi iishona nale , ihe  natango otaya nanwa ishewe, ya kale po owala.

“Ondjambi yandje yokomwedhi N$1 800, ihe omwedhi nguka onda mono ashike N$800, eyovi alihe olya nanwa ko. Iimaliwa mbyoka nda hupu po nayo otandi yi longitha shike? Ondi na ohiila mpoka handi zi, ondi na okulanda iikulya oshowo okukwata olefa okuya kiilonga,” Omuniilonga gumwe a popi ngaaka.
Taya nyenyeta kutya ngele otaya tsikile ngaashi taya ti, kutya oye na okunana iimaliwa mbyoka sigo oomwedhi ndatu, otaye keya tulitha moondjo oshoka otaya kalya omikuli ya gwanithepo oompumbwe dhawo.

Aaniilonga taya ti, omuhona gwawo okwe shi ninga onkalondjigilile, okwaagwanitha po oondjambi dhawo, oshoka noshimaliwa shoka ya uvathana naanilonga oyendji petamoko, hasho ha gandja.
Amushanga mehangano moka Micheal Kunzle okwa lombwele Kundana kutya iimaliwa mbyoka ya futwa koSocial Security okwa li yi na okuya kehangano lyoylene, kakwa li tayi yi kaaniilonga ayihe.
“Ehangano okwa li lyi na okumona oopelesenta 50 lyo tali gandja oopelesenta 50 kaanilonga. Shika osha li sha ningwa oshoka otwa kala hatu futu aanilonga yetu oondjambi dhawo dhi ihwapo moomwedhi adhihe dhoCovid-19,” Kunzle a popi ngaaka.


Victoria Kaapanda
2020-09-15 11:54:12 11 days ago

Be the first to post a comment...