• August 12th, 2020
Login / Register

Aanona ya thigi po enongelo molwa Nakaidhi ta nkenene…Oshikukuta ohaye shi uvu ashike ngokatana komiilya



Victoria Kaapanda

ONGWEDIVA-Esther Haimbodi (12) okwa thigi po osikola opo a sile oshimpwiyu aamwayina  yatano, mboka ya thigwa po kuyina muDesemba omumvogali.

Haimbodi oha kala nayinakulu kOnashiku kuukwambi hoka a kala ta tekulwa noha hiti osikola, ihe ina vula we okushuna, sho a li e ya okutalela po  yina pefudho lyaDesemba.

“Meme okwa yile a ka talela po aakwanezimo ye, komunda Onamutene kElombo muDesemba ihe sigo onena ina galuka. Onda hala okushuna kosikola shili ihe ite vulu okuthiga po aamwameme ye li monkalo yi li ngeyika. Unene okamwameme haka koomvula mbali.” Haimbodi ta ti ngaaka, nomahodhi taga tondoka.
Ta ti ohaya vulu okuninga omasiku gaali inaa makela oshoka kape na sha shokulya. Ta ti egumbo lyawo kali mona oshikukuta mo kamu na nando ogumwe ena uuthemba woshilongo, onkene nuunona ihawumono iiyemo yuunona wuli moluhepo.

Haimbodi okwa ti omvula ngele tayi loko kape na mpoka haya hondama, ohayi pwile ashike komalutu gawo.  Kape na ngoka ta vulu okudhika egumbo lyawo nkene lya likile po kiimuna. Ta ti hekulu oku na uunkundi, ano omuntu gwandohotola.

Ayehe megumbo ohaya lala mondunda yimwe moka ye li yaheyali opamwe nahekulu oshoka kape na we mpoka taya vulu okulala.
Ondunda yimwe ndjoka ya dhikwa niiti, iha vulu nokukaliwa othika komuntu shapo otayi mo a petema.
Aantu mboka oye li monkalo tayi limbilike oshoka kaye na nando iiyemo yasha, onkene kaye na omatalashe nomakumbatha gwokulala.

Kansela gwoshikandjohogololo Oniipa Jerry Ngwena okwa ti onkalo yomegumbo moka okwa li e yi lopotelwa ashike muDesemba ihe kakwa li e shi ngele oyi li ngaashi a li e yi mono momathano ngoka ge li komalungula.

Ta ti okwa li ya ningi onkambadhala Etiyali lya zi ko, sho kwa li sha etwa nawa puuyelele kugumwe goshilyo shokomitiye ndjoka hayi tala mboka taya mono iihuna momikunda, sho a fatulula nokuulika onkalo yaantu mboka ye li muyo.

Ngwena okwa ti okwa li ye ya faalele uushako wepungu lyuusila wu li utano, epakete lyomagadhi gosolo oshowo okapakete koohi dhomoondooha ya ipaluthe mpaka pakathimbo omanga taya yi momusholondondo gwoshikukuta.
Kansela okwa ti okwa li ta kambadhala e ya falele otenda unene ethimbo ndika lyomvula, ihe kape na othayila.

Mwene gwomukunda Elifas Petrus okwa ti onkalo yomegumbo moka okwa kala ethimbo lela e yi shi omanga nomukulupe mwene gwegumbo inaa sa, ta ti wo aantu mboka aakwanezimo ye lela. Ihe okwa ti okwa fa e ya ekelela onkalo yawo oshoka kaye na aniwa omikalo.

Ta ti ye ina hala okufundja nande ihe aantu yomegumbo ndyoka kaye na omikalo naye, sho osho anuwa she mu sitha uunye okuyakwathela. Ihe onkalo ye li muyo oku yi shi lela.
Petrus okwa ti Kansela oshinima shoka okwa kala ethimbo e shi shi, ta ti okwe shi mulopotele nale nale, hapo nando e yi tseya omvula ya zi ko ngaashi ta ti.

Simon okwa  indile moshigwana naku kehe ngoka ta vulu okuya yambidhidha naashoka ta vulu unene ethimbo ndika lyomvula oshoka otaya mono iihuna lela.

Aanona mboka ye na oomvula 2,6,8,9,15,16 ohaya silwa oshimpwiyu kuHaimbodi oshowo hekulu omumwayina gwayina Thomas Simon (44) ngoka e na uunkundi wontumba, iha vulu okulonga sha.
Aalongwa ye li yaali haya hiti posikola pElombe Combined school, gumwe e li mondondo ontine nagumwe e li mondondo ontiheyali oya ningi ethimbo inaya ya ko kosikola. Sho Kundana e yapula kutya oshike ya hulitha po osikola, kakwa li pe na ngoka ta ti sha, k kele kokupongola.

Omukuluntusikola gwoposikola Oshilulu Combined school Mishack Munichinga, okwa ti okwa li  limbililwa konkalo yaanasikola ye ye li yaali mboka gumwe e li mondatu nagumwe e li mondondo ontimugoyi haya hiti posikola oshoka ohaya fawula noonkondo. 

“Kehe moshiwike oye na mo omasiku ge li gatatu nenge gane inaye ya ko kosikola. Ashike onde ke shi uva ko sho nda li ndafatulilwa komuyopaleki posikola yandje onkalo aanona mboka ye li muyo” Munichininga.

Ta ti nando okwa li oye ha zi megumbo moka, ke shi wete ngele otayi ko kosikola oshoka onkalo sho a li e yi mono, okwa zi ko nomutima gwayemata nogwa pongola.

Okwa li atsu aanasikola ye omukumo ta ti inayahulila we miishana taya tege uukwikwiti naya ninge haya thiki kosikola, uuna ya sa ondjala naya popye opo ya longekidhilwe shoka taya monenwapo.


Staff Reporter
2020-03-02 10:24:37 5 months ago

Be the first to post a comment...

You might also like...