• July 20th, 2019
Login / Register

Aapangi ye thike po370 taya lili ompumbwe yiilonga



Victoria Kaapanda

OSHAKATI-Aapangi ya mana kiipitudhilo ngaashi UNAM, Welwitchia oshowo IUM, ye vule po60 oya li ya ningi omunyanyo gwopambili okuza pomatungo goositola poYetu Complex, sigo opoombelewa dhangoloneya mOshana mpoka ya li ya gandja ombapila yawo yomanyenyeto.

Omupopiliko gongundu yaapangi mboka Johannes Salomon, okwa li a lesha mombapila ndjoka ya nyolele ombelewa onene yoshilongo oshowo Uuministeli wUuhaku nOnkalonawa, kutya yo itaya taamba eyamukulo lyawo ndyoka kutya otaya ka pa ashike aapangi ye li 78 iilonga okuza maapangi ye li 370  ya hala iilonga.
“Ndyoka etukano kutse, epangelo nali hulithe oku uvaneka iilombo, kutya otali ka gandja iilonga oyindji ihe ihali shi gwanitha po. Iipangelo oyindji oya kolota aapangi, naanuuvu ye li momikweyo esiku alihe nenge yamwe taya shuna inaya kwathelwa omanga tse mba tu na okulonga po iilonga mbyoka otu li momagumbo noonzapo dhetu kohi yookofa”, Salomon ta ti ngaaka.

Salomon ta ti ngele Epangelo tali ti aapangi 78 ayeke taya pewa iilonga, okuza maapangi ye li 370 nena olyi uvite kutya oshi li mondjila aakwashigwana ya kale momikweyo esiku alihe inaya kwathelwa, oshowo ya longithe aapangi mboka ya kutwa nuudhigu okuza ongula sigo 13h00 ina ya inyenga.

Ta ti oshi li tashi lulumike konima yomimvo adhihe ya kala taya ilongo neyitulemo nokufutilwa oosikola dhawo kEpangelo, ihe nena otali ya ekelehi momapandaanda, kutya naya tegelele gumwe a se, a ze mo miilonga nenge a mbendange opo gumwe a mone iilonga.

Ta gwedha po ta ti aakuluntu yawo oya kala ye li menyanyu kutya otaya ka kwathelwa koyana mboka ya  mana, ihe nani hasho. Oye uvite nayi noonkondo nomayipulo  kutya Epangelo lyawo ndi haya hogolola olyo tali ya ningi ngaaka, ta ti ke wete taya kala nohokwe okuhogolola we, ngaashi naanaa omahogololo ga thika ngaaka.

“Tse otwa hala atuhe onge aapangi ye na oonzapo adhihe dha pumbiwa tu kale twa pewa iilonga kape na nando ogumwe ta hupu po, ngele oya ndopa oku tu yamukula otatu ka kutha etokolo sigo okoombelewa dhaAmerica hoka haku zi oshimaliwa shoopologalama dhoUSAID shi hule.

Ta tsikile ko ta ti epangelo nalyo nali ninge po sha, lyi thiminike iipangelo yilwe yi kute, ngaashi Medipark, Rhino park, Medi Clinic noRoman Catholic Private Hospital, yo yi hulithepo okupula oontseyo dhi thike pomimvo 5 oshoka kaye na mpo taye dhi adha.

Iipangelo oya udha ashike aakwiilongo oyo taya panga omanga yo ye li momagumbo yaa na sho taya longo moshilongo shawo.

Ngoka a taamba ko ombapila peha lyangoloneya Micheal Mwinga okwa li e ya yamukula kutya etumwalaka lyawo olya yela nolya ukilila, note li thikitha kwaamboka lya nunininwa.


Staff Reporter
2019-07-05 11:56:01 14 days ago

Be the first to post a comment...

You might also like...