• May 31st, 2020
Login / Register

Aavali oya hala osikola yi kale hayi futwa



Victoria Kaapanda

OSHAKATI - Nonande kehe omuvali pethimbo ndika lyetameko lyosikola ota tondokele koositola oku ka landa iilongithomwa yaanona yawo, aavali otaya nyenyeta kutya okufuta osikola hwepo.
Aavali oyendji oya ti kaye wete elongo lya fa lyoshali we, oshoka otaya zi iimaliwa oyindji okulanda iilongithomwa yosikola.

Martha Netumbo Frans ngoka a li a thindikile okanona ke esiku lyotango kosikola kEhenye hoka ta ka yi mondondo 5 okwa ti okwa longitha iimaliwa yi thike N$1000 okulongekidha omunona gwe a kale e na iinima ye ayihe yosikola a kwatela mo ondalaha.

Ta ti: “Elongo lyoshali ndi tali popiwa nani olini? Nenge epangelo okwa li lya hala lyi tu kuthe imaliwa monyowa ano?” Frans ta pula ngaaka.

Frans okwa li a lombwele Kundana ta ti ethimbo ndiya haya futu osikola okwa li oshihwepo, ta ti kakwa li haya mono iihuna ngaashi paife.

“Epangelo nalyo otali ti kali na iimaliwa, nena tse iimaliwa otatu yi adha peni? Ndino emono lyiihuna.  Tse otu na uunona owundji momagumbo wumwe owaamwameme ya hula ko nale, otatu wu tsakanitha ngiini oku wu gwanithila po oompumbwe dhawo ayehe. Epangelo nali tale po nawa mpoka,” Frans ta popi ngaaka.
Aavali oyendji itaya popile elando lyomambo goosikola.  Oyendji oya ti iimaliwa yawo otayi pwile ashike maanasikola yo taya thigwa iikaha yowala.

Taya ti osikola ngele oyoshali, nayi kale ashike yoshali. Kape na nando oshimwe tashi futwa shi na sha nosikola.

Oosikola nadhi kale tadhi futwa dho tadhi gandja ashihe aalongwa ya pumbwa.
Aalongi yamwe nayo oya li ya tsu kumwe naavali kutya aavali oye li muudhigu wokulanda omambo noopena oshowo oombapila dhokuninga ookopi.

Taya ti oshidhigu kwaamboka kaye na iiyemo opo ya lande iilongithomwa yaanona yawo oshoka okanona hoka ka ke na mpoka taka shanga.

“Ngele okanona inaka landelwa omambo, nena natse katu na nkene tu na oku ka ninga oshoka katu na mpoka ta tu ka longele. Oombelewa dhetu kadhina sha omambo. Shoka ohashi eta aalongwa mboka kaye na sha ya shune monima meilongo lyawo,” omulongi gumwe ta ti ngaaka.


Staff Reporter
2020-01-16 07:56:24 4 months ago

Be the first to post a comment...