• July 13th, 2020
Login / Register

Aavu yotango yoCovid-19 ya aluka



Aakwashigwana Aaromania yaali mboka ya ningi omasiku 79 moshipangelo taya pangwa omukithi gwoCovid-19 oya aluka. Mbaka oyo aantu yotangotango ya momika omukithi ngoka moNamibia.

Nonande iipotha yoCovid-19 mbyoka ya lopotwa tango moshilongo oya aluka oshilongo natango sha lopota ishewe oshipotha oshipe shoka ngashiingeyi sha eta iipotha mbyoka yi kale 25.
Minista gUuhaku nUundjolowele Kalumbi Shangula okwa hokolola kutya eyaluko lyAaromania mboka olya etitha iipotha yaamboka ya aluka koCovid-19 moshilongo ashihe ngashiingeyi paantu 16.  Ngashiingeyi oshilongo oshi na ashike iipotha iipe, naambyoka ayihe oya za kondje yoshilongo.

Shangula okwa hokolola kutya Namibia okwa li a pititha po omasiku ge li 45 ina lopota nande omuntu a kwatwa komukithi ngoka nokwa ka tameka ta lopota iipotha mbyoka kaantu sho ya tameke okuya kegumbo unene Aanamibia mboka ya li ye li kondje yoshilongo.
Minista okwa hokolola woo kutya ngashiingeyi moshilongo omu na oshipotha oshipe shoka shi li oshipotha oshi-25 oshomupangi ngoka a li a yi koshilongo shaSouth Afrika moshilando shedhina Cape Town  kehulilo lyaMaalitsa  nokwa galukile moshilongo mEtitano lya zi ko.
“Omukiintu nguka gwomimvo 32 okwa li a ikalekelwa  meendelelo sho a thiki moshilongo,  okwa li a konaakonwa nomakonaakono ngoka oga li ge ya taga ulike kutya oku na ombuto ndjoka.  Okwa li e na omandhindhiliko gekulu,  nonkalo ye otayi etitha oonkondo,” osho minista ngoka a hokolola ongula yOmaandaha (ohela).

Ngashiingeyi moshilongo omu na iipotha omugoyi mbyoka oyo yi li mo tayi ehama na ka mu nonande omuntu a sa komukithi ngoka sigo onena.
Ashike Shangula okwa hokolola kutya oshipotha oshi-22 oshi li mokoma sigo onena na inapu ya nande omalunduluko ga sha hela omuvu ngoka a taambelwa moshipangelo.
 


Loide Jason
2020-06-02 09:02:02 1 months ago

Be the first to post a comment...