• September 27th, 2020
Login / Register

Aayihomboli ya iyithana aanelago



Gidion Hamukwaya (52) na Pehovelo Martin (50), mboka yatulwakumwe oshiwike sha ziko, sho ya kala pamwe  omimvo dhapita 30, oya ti shoka ya longelwa koshigwana oshinene noka shi shi okuyelekwa.
Amukwaya okwa ti, yo oya yambekwa, yo aanelago oshoka oyo yotango ya longelwa uuwanawa wa tya ngaaka koshigwana shaNamibia, shoka kwa li sha ningwa ashike muule womasiku gatano omanga esiku enen lyawo inaalithika.

“Elalakano lyetu okwa li ashike lyokuyambekwa nokutulwa kumwe kuKalunga. Kakwa li tu na edhiladhilo lyoshituthi, kakwa li natango twa tseyithila aakwanezimo yetu ayehe,  koombinga adhihe oshoka kakwa li tu na sho tatu ya pe,” Hamukwaya ta ti ngaaka.
Taya pandula taya ti oya yambidhidhwa kaantu kaye ya shi yo inaye ya pamba. Ta popi nenyanyu ta ti, kehe ngoka a li ayambidhidha ohango yawo, mpoka a kuthile, napu shune shoka ya kutha po okuyambidhidha oshituthihango shawo iikando omulongo.
Nekwaya ngoka ta hupile ashike mepya lye oshowo miilonga yokoonyala uuna e yi mona okwa ti esiku lyohango yawo okwa li e wete a fa ta tsu ondjodhi oshoka oya yambekwa noshindji naashoka kakwa li ya tegelela.

Ta ti, ayihe ya li ya hupupo nayo, okwa li ye yi topolapo noyana yawo, aashinda oshowo ongeleka.
Nekwaya naMartin, oya yambekwa naanona ye li omugoyi, mboka ayehe kaaye na iiyemo yasha. 
Oya yambukile momukunda Omutse gwohorongo Moshitopolwa shErongo.

Ohango yawo okwa li ya yambidhidhwa koshigwana sho shali sha mono okavidio komalungula taka ulike omayigidho ngoka gali mongeleka patatu.
Okwa li ya tothwa mo mokati kayakwawo onga aanelago, sho ya li ya gwongelwa oshimaliwa sha pita N$30 000 okuninga oshituthihango shawo. “Kakwa li twapula nando omakwathelo moshigwana okuninga oshituthihango shetu, ihe nani Nampongo okwe shi tula nale miilonga. Shika okwa li sha holoka koonkondo dhaKalunga,” Hamukwaya  a popi ngaaka.
A popi ta ti, ohole yOmuwa onene nokayi shi ku yelekwa. Uuna wu li muuyuki noto longo uuwanawa, esiku nokatyapula uuwanawa shi vulithe shoka ho longo. 
 


Victoria Kaapanda
2020-08-31 11:04:19 27 days ago

Be the first to post a comment...