• September 21st, 2020
Login / Register

Achiina ya gandja kaakulupe mOngwediva 



ONGWEDIVA - Gumwe gomakulupe ye li 150 mboka taya ka topolelwa iikulya kElelo lyondoolopa yaNgwediva gwomomukunda Omatando mOngwediva, Mulongeni Julius okwa ti okwa pandula aanangeshefa yAachina kwaashoka taya longele oshigwana.
“Omvula ya zi ko okwa li twa dhengwa koshikukuta omolwomuloka ngoka inagu loka nawa, iimuna yetu oya sa po ayihe, e tatu thigala po nowala. Omvula ndjika okwa li twa yambekwa nomuloka omwaanawa ashike natango omvula ndjika egandjo lyiikulya yoshikukuta olya galuka omolwomukuthi gwoCovid-19,” Julius ta ti ngaaka.
Ta pandula ta ti, okuuvite kutya oye omunelago, sho a tothwa mo maantu ayehe 150 ya nuninwa okutopolelwa iikulya, opo e ye a tambule iikulya ye tango. 

Julius okwa pewa oshako yi na osuuka, uusila, omakoloni omagadhi gokulya oshowo ekumbatha lyokwiisiikila. Iikulya ayihe kumwe nomakumbatha oyongushu N$45 000. Omukuluntu gwomakwatathano noshigwana mombelelwa yelelo lyondoolopa yaNgwediva Jackson Muma okwa ti aantu mboka taya ka topolelwa iikulya mbyoka aakulupe ashike, nomadhina gawo oye ga na nale kutya olye e li mompumbwe unene.
“Omusholondondo gwomagumbo gaakulupe mboka taya ka pewa iikulya mbyoka otu gu na nale, otushi shi kutya oolye ye li mombumbwe unene, naamboka ya shunithwa monima komukithi nguka,” Muma ta ti ngaaka.

Omupevinashipundi gwehangano lyAachina moNamibia Jiang Bo okwa ti iikulya mbyoka oya nuninwa aakulupe moshitopolwa ashihe shaNgwediva mboka ye li mompumbwe unene oshowo mboka ya kanitha iiyemo yawo omolwomukithi nguka.
“Ehangano lyetu otali yambidhidha nokashona tu na po, opo tu ulike uukume wetu naNamibia oshowo olukeno tu na noshigwna shoka sha kanitha nosha shuna monima omolwa oCovid-19,” Bo a popi ngaaka. Ta gwedha po ta ti Namibia egumbo lyawo etiyali, onkene oye na okukwathela mpoka taya vulu onga omuntu namumwayina.

Bo okwa li a kumagidha natango aanangeshefa aanene naashona opo nayo yambidhidhe oshigwana mpoka taya vulu, oshoka oshigwana oshi li mompumbwe lela, unene pethimbo ndika. Ta ti aantu oyendji oya kanitha iiyemo yawo, onkene otaya pumbwa omakwatho ogendji lela. Ohashi kala sha wapala uuna oshigwana tashi kwathelathana.  Etiyali lyoshiwike shika natango Aachiina oya gandja iikulya ya faathana kelelo lyondoolopa yaNdangwa lyi topolele aakulupe moshitopolwa moka ye li 150 mboka ye li mompumbwe unene.


Victoria Kaapanda
2020-06-19 09:30:21 3 months ago

Be the first to post a comment...

You might also like...