• December 18th, 2018
Login / Register

Aimee omuhikingalo omupe ko061 Music



WINDHEOK-Aimee Arnold, okakadhona hoka haka imbi oongalo dhoRnB noAfro Pop, oka mono ompito ombwaanawa yokushainwa kehangano lyokwiimba lyo061 Music.

Ongundu yo061 Music oyo ndjoka ya tseyika nawa nokwiimba omaimbilo gawo omawanawa ngoka ga kala nokunyanyudha aapulakeni mwa kwatelwa Click Song, noya li ya totwa po oomvula 10 dha ka pita komuhikingalo ngoka a hulitha mo 2014 gwedhina Catty Cat.

Ongundu oya li ya tseyitha ongalo yawo yotango omvula ndjika yedhina ‘Down 4 the Nana’ ndjoka ya ningwa omikwelengendjo kuDoming Beatz. Ongalo oyi li tayi inyenge nawa kooradio konyala adhihe dhomoshilongo.
Ewi lyaAimee otali uvika mokangalo ko061 Music okape kedhina Falling, hoka ka piti oshiwike sha zi ko. Aimee okwa ti okwa li a kumwa pethimbo a li a pulwa kugumwepo gomaaimbi yo061 Music, Sinna-G, opo a tameke oku imbila ongundu ndjika.
“Nonando okwa li nde shi dhiladhila ethimbo, onda ka mona kutya ndjika oyo ompito yandje ombwaanawa, nokwa li nda itayele opo ndi ninge oshilyo shongundu ndjika,” Aimee ta ti ngaaka. 

Aimee ngoka e na ewi lyoshingoli okwa li a tameke okwiimba manga omushona, pethimbo a li ha imbi mongeleka nosikola yosoondaha.

Ngashingeyi Aimee oku li tashanga omaimbilo ge pamwe nongundu ndjika, ngoka taga ka uvika moalbuma yo061 Music yedhina Nothing but Beautiful, tayi ka pita omwedhi nguka.

Sinna-G okwa ti ongundu ndjika yi li yi na omaimbilo ge na omulyo omupe, oyi li tayi shaina aahikingalo aape, mboka ye na iitalenti ya pyokoka nawa. Shika osha landula ishewe sho ya li ya shaina omuhikingalo Balu, ngoka a imba mongalo Down 4 the Nana.

061 Music oya totwapo kuCatty Cat naLucci mo2010, nongashingeyi oyi li yi na aaimbi ye vule puyahetatu. Omaimbilo gawo oga kala nokusindana omakopi ogendji unene moshimpungu shoongalo dhoHip hop, nokwiimba pamwe methigathano lyokugandja omakopi kaahikingalo dhingi moshilongo.


Pinehas Nakaziko
2018-11-09 11:12:11 1 months ago

Be the first to post a comment...