• July 13th, 2020
Login / Register

Anuwa aayelele otaya thiminikwa ya thange osikola omuthi molwoondjokana



Omuleli gwAayelele momukunda Ekoka moshikandjohogololo Okongo Festus Nakale okwa ti oku na eikwatopomutima lyonkalo yaanona aayelele taya yi moondjokana kuyele, ta ti onkalo ndjika oya thiminika aanona oyendji ya thige po oosikola opo ya gwanithe po iinakugwanithwa yawo yoondjokana. Nakale okwa li a lombwele oshikundaneki shoNew Era ta ti moshigwana shaayelele omu na aanona oyendji taya ningi omategelelo aashona unene, osho wo okuthiga po oosikola, ta ti shika omolwomuthigululwakalo gwawo naakuluntu oyendji otaya thiminikile aanona moondjokana, taya pingakanithwa niikolitha osho wo iikutu.

“Onkalo ndjika oya nayipala noonkondo. Aantu yetu kaye uvite ko esimano lyelongo. Epangelo olye tu kwathela miininma oyindji ashike ondi wete twa itaala unene momuthigululwakalo nomomalovu,” Nakale ta ti ngaaka.
Ta ti nonando epangelo lya tunga omuhandjo kEkoka Primary School, olundji anuwa shampa ashike aanona ya pewa ompito yokuza mo momuhandjo mehuliloshjiwike, nena ihaya galukile ko we kosikola.

“Uupyakadhi ou li maavali. Ohaya kala ye uvite nawa uuna taya yi noyana kookamba, nuuna ya thika mepipi lyokamukondapweyu ohaye ya tsu omukumo ya kuthwe po kaalumentu yo taya pewa iikolitha,” ta fatulula ngaaka. Nakale ta ti wo aavali yamwe otaya thiminike osikola yi kale hayi dhungu otombo ngele oya hala aanona yawo ya kale momuhandjo.
Ta ti limwe lyomomatompelo sho aanona taya thigi po osikola olyo uunyengwi welaka. “Aanona yetu kaye uvite Oshikwanyama. Ohaya popi elaka lyoshitakumi. Naashika ohashi ya thiminike wo ya thige po osikola oshoka kehe shimwe ohashi ya ningile oshidhigu.”
Okwa li a gandja omayele ta ti epangelo nali mone omukalo gwokufala aanona mbaka kiitopolwa yilwe ngaashi koTsumkwe oshoka hoka oko ku na elaka ndyoka haya uvu.

“Ope na aavali mboka yu uvite ko esimano lyelongo ashike uupyakadhi ou li mpaka kutya ope na aalongwa mboka kaye uvite elaka ndyoka tali longithwa mosikola. Oshidhigu okutsikila,” ta fatulula ngaaka.
Gumwe gwomaalongi posikola mpoka, Tabita Kamhulu ngoka ha longo oshikunino, okwa ti aavali yaayelele oyo unene haya eta aanona ya thige po osikola. Ta ti wo oondjokana dhaanona ohadhi etwa molwonkalo yokwaathike pamwe osho wo eyitaalo kutya aakadhona naakiintu kaye thike pmamwe naalumentu.

“Omithigululwakalo dhawo odha tala ko aakadhona onga omaliko gaalumentu. Omathimbo gamwe ohapu longithwa oonkondo opo aakadhona ya itaale okuya moondjokana ndhika,” ta fatulula ngaaka. Kamhulu ta ti aanona oyendji ohaya kala aashona nokuninga omatokolo ge li mondjila kombinga yoondjokana ashike ohaya iyadha ashike taya thiminikwa konkalo. New Era okwa li a tsakanene naahokanathani yaali mboka taya dhimbulukwa ashike kutya oya li ya hokanathana sho ya li ye na oomvula 11. Epifa Phillipus naTimo Johannes oya li ya hokolola kutya oya kala nawa mondjokanana yawo, nangashiingeyi oye na aanona yatatu.
 


Loide Jason
2020-06-22 08:22:34 21 days ago

Be the first to post a comment...