• September 21st, 2020
Login / Register

Bushiri a taataa ovafita moilonga… Ashike kape na ouyelele ngee eshi osha kwata ovafita vo-ECG moNamibia



Victoria Kaapanda naLasarus Hakwaake 

ONGWEDIVA –Nonande ovafita Ovanamibia mongeleka yoEnlightened Christian Gathering (ECG) va li vamwe vomongudu oyo vati ya lombwelwa komukulunhu wongeleka oyo kutya ota ka lundulula, fiyo opa pa inashi yela ngeenge muvo omu na vamwe va tewa tewa moilonga omafiku aa. 

Oikundaneki ya yooloka moSouth Africa oya lopota Omupolofeti Sherpherd Bushiri a taata ovafita vaheyali ndele ta kaleke pedu ve li vatano ovo tava ningilwa omakonaakono, konima eshi vati va tamaneka okukala veli ominge newiliko laye.

Etokolo laBushiri ola monika mewi olo la kwatwa noku tuminwa kovafita moshitayi shaye oshoyo kovafita moshilongo ashishe, Bushiri okwa popya kutya ovafita ova tota po okangudu koWhatsApp nove ka longifa okunyateka edina laye oshoyo okukala omhinge newiliko laye. Bushiri okwa popya kutya ovafita okudja koilongo imwe muAfrika otave mu ula kutya ye omupolofeti omunaipupulu nova sheka elongo laye longeleka.
Ovafita vaheyali ovo va tewatewa mongeleka kuBushiri ovo: Omufimanekwa Arthur Martin Kunje, Omuyapostoli Stanley, Omufita Dumnamis, Omufita Mike Faiton, Omufita Wilson Madise nomuyapostoli Felixosis. Ava va kalekwa pedu manga Bushiri okwa ti ovo Omuyapostoli Hoppings, Omufita Kadzuwa, Omufita Eric Kusane, Omufita Wisdom oshoyo Omufita David Ruach, okwa ti ava inava popya unene shihapu momakwatafano kongudu yoWhatsApp.

Kundana okwa Kundana kutya, petameko lodula ei, Bushiri okwa li a ongela ovafitaongalo laye aveshe mwa kwatelwa Ovanamibia, nomoshiongalele omo okwe va londwela kutya ota ka eta elunduluko mongeleka omo, ta ka kufa vamwe vomovafita peenhele.
Eenghendabala da ningwa kuKundana okupopya navamwe vomovafita vo-ECG moNamibia oda xulila mounyengwi. Vavali vomuvo ova lombwela omutoolinghundana kutya na popye nomupopiliko wongeleka moNamibia, omanga omupiliko wongeleka moNamibia a lombwela Kundana vati na popye nomupopiloko wo-ECG aishe oo e li koSouth Africa. Ongodi oyo yokoSouth Africa oya kala shike tai lili no itai kufwa po. Omapulo a tuminwa koWhatsapp yaye ine a nyamukula. 

Oikundaneki yaSouth Africa ota i ti, Bushiri ou a yambukile koMalawi, okwa ti okukwete omafano aeshe eenghundafana da ningwa pamakwatafano oo a ningwa pokati kovafita momakwatafano avo opomunghulo. Okwa ti oshikalimo shomatumwalaka oshii unene inava pumbwa oku pwilikinwa ashike ove na okutewa tewa ashike.

Umwe munene, ngaashi Bushiri a shiivika nawa mokati kovalanduli vaye, okwa popya vali kutya okwa udifwa nayi unene komufita Felixosis shaashi oye omufita umwe ou a kala popepi naye, a kulila meumbo laye nokwe mupa ashishe eshi a pumbwa. Bushiri okwa mana ta indile oukumwe mongeleka, ta ti kutya ongeleka kai shi ehangano lopaumwene, ile opoloyeka yomunhu umwe.


Victoria Kaapanda
2020-05-29 09:32:42 3 months ago

Be the first to post a comment...