Kubonahala inge hakuna bukamuso bobunde, balimi balikomu mwasikiliti sa Zambezi habazwelapili kulatehelwa kilimunanu zabona kwamalengwami balikomu, ili buñata bwabona basimuluha mwanaha Zambia, mi basila isi kamulao kuto uzwa likomu mwanaha Namibia.
Mwakezahalo yacwale, likomu zelishumi kazelobapeli zene uzwizwe liviki zepeli zefelile kwamunzi waKasheshe mwasilalanda sa Sibbinda, mwasikiliti sa Zambezi, nelikutisizwe mwanaha Namibia kakusebelisa museto waKatima Mulilo (Wenela sapili) Labulalu.
Sibuabui wasipokola mwasikiliti sa Zambezi mutatubi Kisco Sitali natolokile kuli likomu neli ilo fumaneha Labubeli mwasilalo sa Lusu, libima zelikana zemashumi asilezi kuzwa kwamuseto wanaha Namibia.
“Neli fumanwi katuso yalimembala zasicaba mwanaha Zambia, hamoho cwalo nimapokola baluna bababona zakutibela busholi bwalikomu bane basweli kubatisisa,” nekubulezi Sitali.
Haneli masholi bona nebasika fumaneha kasamulaho akubaleha habakaliketwa kilimembala zasicaba. Muña likomu Alistar Twabushalila naize likomu neli uzwizwe kakusasana la 03 Muimunene 2022, kanako ya 09h00 nakonyana limano zwiswa mwamulaka.
Twabushalila nakupile mapokola kutusa kulwanisa busholi bwalikomu. “Baswanela kubeya masole kwamukulela wamuseto, kusi cwalo likomu zaluna lika feela. Habazibi manyando aluna hala likomu ze, kuli yomuñwi atahe nikuto linga mahala,” nekubulezi Twabushalila.
Kono Sitali naize mapokola bababona zakulwanisa busholi bwalikomu bapateheli kubelekisana hamoho ni mapokola banaha Zambia kulwanisa bubangoki. Nakupile hape balimi kubabalela likomu zabona nikupotela milaka nako kaufela.
“Kamita lukulisanga kwamukulela wamuseto hamoho ni mapokola banaha Zambia. Nihaike halu ezi cwalo kazazi, luezanga cwalo kasamulaho alikweli zetalu, kushoka kuli museto waluna ucwañi, nikubona bubangoki bobunze buezahala, nekutolokile Sitali.
Busholi bwalikomu bubonahala kupahama mwasikiliti sa Zambezi, mi mwalikweli liketalizoho zefelile likomu zefitelela 200 neli uzwizwe, nikukenywa mwanaha Zambia.
Teñi kubihiwa kuli kuna ni musika omunde wakulekisa likomu. Babañwi mane basebelisa likomu zeo kuyo lifa malobolo.