• February 22nd, 2019
Login / Register

D-Jay ota galula omulyo gwoHip-hop



WINDHOEK-Nonando aahikingalo oyendji oye li taya hedha kokule oku eta po nokuwiimba oongalo dhoHip-hop moshilongo, omuwiimbi gwedhina D-Jay oku li a ndjika oonyala mevi, nokwa ti ye ota tsikile nokwiimba oongalo dhe dhoHip-hop, nelalakano lyokugalula omulyo gwoongalo dhoHip-hop mehangano lyoongalo. 

Shika okwa li e shi ulike nomusholondondo gwoongalo dhe oompe gwedhina Champion, oalbuma ndjoka opo ya li ya piti omwedhi gwa zi ko. Oalbuma yaD-Jay oya holoka konima sho ali ashainwa kehangano lyoDeal Done Records omvula ya zi ko.

D-Jay ngoka a ningi uule wethimbo inaa imba nokwa kala ta lesha ehangano lyoongalo manga inaa shainwa kehangano olyo tuu ndjika, okwa kala nokutseyitha kepandja lye lyoFacebook ta ti oalbuma ye otayi ka galula omulyo gwoongalo dhoHip-hop, naaholi yoongalo otaya ka tsikila noku pula kena oongalo dhawo ndhoka yehole. 

D-Jay okwali ishewe a ulike enyanyu lye oku kala aholokapo noalbuma ompe, kohi yehangano lyoongalo ndyoka hali tseyitha, nohali kwathele aahikingalo unene mboka taya nana nondatu. 

Oalbuma yeChampion, oyo ndjoka yi na omaimbilo 15, mwa gwedha uungalo utatu mboka woshali, wanuninwa aaholi yoongalo dhe. Moalbuma muka oku li a imba pamwe naahikingalo ngaashi Don Kamati, Mabuzza, Dj Dozza, Staxx Major, Jericho, Ethnix okutumbula po ashike yamwe.

Omu na omaimbilo ngoka ge na ongowela ontoye yoHip Hop. Moalbuma muka oku li ishewe a hikulula ongalo Siwelewele, ndjoka ya kala noku tseyika koyendji. 

D-Jay okwati oalbuma ndjika otayi kemusindanitha ishewe omakopi koshiindingili shoku gandja omakopi kaahikingalo aaNamibia dhingi moshilongo, shoNAMAs.

Oalbuma oyili ya ningwa omikwelengenjo kuSolani Glo naStaxa. Ongalo yedhina Favorite Song nyoka yali ya piti onga okangalo kotango oyo yili yadhenga mbanda, noyakala ponomola yotango moongalo ndhoka dhashigako dho Hip-hop moshilongo.

D-Jay okwatseyitha taka thaaneka uuvido uupe omasiku hamale twataalela. Okuli ishewe ta ilongekidha oku ka ulika nokutseyitha oongalo dhe moshilongo ashihe.


Pinehas Nakaziko
2019-02-01 11:57:02 21 days ago

Be the first to post a comment...