• November 14th, 2019
Login / Register

E ku pa kashona…Ngoloneya Nghaamwa a gandja omahangu kiitopolwa itano


OMUTHIYA – Ngoloneya Usko Nghaamwa, polwe mwene onga omukwashigwana okwa li ohela a gandja iilya yomahangu tayi vihi oometric tona 12 kiitopolwa itano, Oshikoto, Oshana, Omusati, Kunene osho wo Ohangwena opo ku kondjithwe onkalo yoshikukuta ndjoka tayi nkenene notayi pula kolutu moshilongo. Nghaamwa, ngoka e li omunafaalama moshitopolwa shaShikoto, okwa ti okwa gumwa konkalo yoshikukuta ndjoka yi ihanena oshilongo ashihe, onkene okwa mono shu uka a vule okutopolethana nayakwawo okashona hoka a likola. Ofaalama ye oyi li kOmaimbi moshikandjohogololo shaNehale lyaMpingana.

Oshitopolwa kehe osha pewa oometric tona 2,4 dhomahangu, naadhika okwa tegelelwa dhi ka topolelwe mboka ye li mompumbwe miitopolwa mbyoka. “Ngaashi atuheni twe shi tseya, nuumvo omvula inayi ga dhenga pevi nando. Onkene iilya mbika tandi gandja mpaka nena eteyo lyomumvogali, ashike natango oyi li nawa otayi vulu okuliwa kaantu. Onkene dhimbulukwa kutya iilya mbika oya longwa pwa tulwa ombunda moshihwa, onkene otandi indile Aanamibia aakwetu tu ituleni mo tu longeni iikulya yetweeni,” Nghaamwa ta popi ndhoka pethimbo iilya tayi gandjwa pOmuthiya.

“Pehala lyoongoloneya mboka ye li mpaka, otatu kwashilipaleke kutya omahangu ngaka ga gandjwa nena mpaka otaga ka topolwa pawuyuuki kwaamboka ye ga pumbwa unene. Elago enene otu na nale omilandu miitopolwa yetu nomiikandjohogololo ndhoka hadhi landulwa mokutopola iikulya yoshikukuta, onkene odho tatu ka landula,” osho ngoloneya gwaShikoto Henock Kankoshi a ti ngaaka.

Kankoshi ta lombwele wo oombushe miilonga kutya iilya nayi ka thike kwaamboka ye yi pumbwa meendelelo. “Onkalo yoshikukuta ndjoka ya taalela aantu yetu niinamwenyo otayi ende tayi nayipala, onkene oonkambadhala ngadhika nadhi kuthilwe ko egala,” ta gwedha po ta ti ngaaka.

Ngoloneya gwaShana Elia Irimari, okwa li a taamba ko omagano ngaka. Ta ti wo aantu naya tameke okutala kombinga yomaludhi ga yooloka gomahangu, ta gandja oshiholelwa shiilongo ngaashi India naSenegal, mbyoka ta ti ohayi longo omaludhi ge vule 400 gomahangu.

Ngoloneya Nghaamwa okwa simanekwa koyendji nokwa lukwa nokuli Tate Krismesa sho a kala nokuyambidhidha omahangano noohandimwe mboka ye li mompumbwe. Omanambo ga zile ko okwa li a gandja oondhopi 58 000 kOmungwelume Secondary School opo ku vule okutungwa omuhandjo.
 


Obrien Simasiku
2019-09-13 09:14:13 2 months ago

Be the first to post a comment...

You might also like...