• August 25th, 2019
Login / Register

E li mangeleka konima yokutwana nombele


Omuthiya - Omulumenhu womuAngola oo vati a twa mukwao nombele konima yeenhangu, okwa hangwa a endjelela momuti a fya mexulilo-shivike.

Otaku hokololwa oshimhu shaJohannes Jukiipo Kasheshe, a dile kOndjiva koAngola sha hangwa shaola konima yomafiku a ne eshi a kala e he wetike.

Ouyelele wa yandjwa komukwatakanifi wopolifi mOshitukulwa sha Shikoto Deputy Commissioner Naomi Katjiua ota u ti, Kasheshe okwa li ta tanguna nomulumenhu, omunailonga mukwao oo va kutwa meumbo limwe, eshi ye a kufa mo ombele noku i twa mukwao. Eshi a mona kutya okwa monifa mukwao oshiponga okwa faduka po. Nakutuwa okwa ka patulula oshibofa sheehameko kopolifi, ashike Kasheshe ka li a dula oku kwatwa po shaashi kali e  wetike. Okwe ke li tuwa ashike a fya nale. Oshiningwanima eshi osha ningilwa momukunda Okatope mOshitukulwa shaShikoto.  

Pokati opo opolifi mOshikoto oya kundana vali elikufomwenyo natango lomulumenhu omukwashiwana waAngola. Nakufya ou okwa tongololwa kutya oye Ismael Panduleni Domingus, 22, a dile komukunda Omhokolo, uli koshitukulwa shaCunene, moAngola.  

“Otaku hokololwa kutya Domingus oo kwali ha lifa eengobe pomukunda opo, a dja koukamba nakaume kaye, ndele tava i vaka nangele. Ashike eshi kaume kaye a ka pita ongula Domingus ke mo mondunda. Olutu laye ole ke li tuwa momuti u li popepi, e li mangeleka nodalate,” Katjiua ta ti.

Katjiua ta ti Fillemon Nasimane Angula, omunamido 29  Omunamibia wokomukunda Okamwiyu mOlukonda, ye okwe li mangelekela mondunda yaye yokunangala nongodi yolusheno. Katjiua ta ti kaku shivike kutya Angula okwe li mangelekela shike, shaashi ina fiya po okambapila kena ngeno ouyelele washa. 

Lwopokati opo, opolifi mOshikoto oya lopotelwa efyo lomukulupe womido 82 womomukunda Oshitambo, mOshigambo. Omukulupe ou okwa pya po filufilu konima eshi onduda yoshipeleki omo ha nangala ya yaka omundilo.   

“Vati nakufya okwa li ta telekele monduda pefimbo loshiningwanima” Katjiua ta ti ovashiinda ova kendabale ngeno oku kwafela ashike ina va pondola sha.  Nakufya oye Teopolina Shikongo (82), novakwanedimo laye ova shivifilwa. 
 


Obrien Simasiku
2019-08-13 07:37:16 11 days ago

Be the first to post a comment...