• November 22nd, 2019
Login / Register

Eepoloyeka mOhangwena oda fikama... dimwe otadi shongola


EENHANA - Okangudumutima komutumba wopashiwana keliko, omayakulo oshiwana oshoyo eepoloyeka domapendulepo oshiwana oka talela po oshitukulwa shaHangwena opo va tale nghee eepoloyeka dokuxumifa komesho oshiwana tadi longo.
Ngoloneya Usko Nghaamwa okwa kufilako okangudumutima kutya, nonande pa ningwa eenghendabala dihapu opo ku kale kwa tulwa moilonga eepoloyeka domaxumifokomesho, shihapu osha pumbwa oku longa natango opo ku dule tu yandjwe omayakulo elixwapo. Okwa holola kutya ombelewa yelelo yOhangwena oya pumbwa oku nghonopeka paku pewa omutengenekwafaneko wavo vene weepoloyeka domapendulepo opo va dule oku shinga noku etapo exumokomesho vo vene. Okwa didlika kutya ngeenge Ohangwena oya pewa eenghono doku etapo omaxumokomesho  lavo vene nena eshi otashi ka eta exumokomesho li kale li li koshidudu. Edi okwe di popya eshi a li ta kufileko okangudumutima komutumba woshiwana oko kwa li keya oku li talelako noku uda nghee eepoloyeka domapendulepo oshiwana tadi katuka moshitukulwa Ohangwena. 
Ngoloneya okwa popya yoo kutya eepoloyeka dimwe moshitukulwa oda fikama, ngaashi okapale komaudano mEenhana oka ninga paife eedula omulongo inaka  pwa, dimwe otadi shongola, nashi osha eta ovakwashiwana vape elelo lopashitukulwa oushima kutya olo itali longo nawa. Ashike Nghaamwa okwe li kanyuna eembedi edi kutya, edopo, nefikamo lepoloyeka doshiwana dihapu ola etwa kepangelo lopokati eli lina eenghono oku tula moilonga eepoloyeka doshiwana, omafimbo ahapu epangelo lopokati ohali tula moilonga eepoloyeka doshiwana pehena ekwatafano novanhu ava veli moshitukulwa omo. Okwa yandja oushima kutya epangelo lopokati ihali yandje omutengenekwafaneko woimaliwa komalelo opashitukulwa nashi oshi li oshidjemo shinyemateka shashi oinima aishe otai ningwa ashike okudya koVenduka. Nenyeme linene Ngoloneya okwa popya kutya kapena nande okamaliwa kopaulumomumbwe, nena ngeenge pa holoka nange oshiponga nena ohava kuwu koVenduka oko kudje ekwafo, tala nee Ovenduka apa ili? Osho a mana ngaho alya menyandi lela.
Omunashipundi wOhangwena Regional Council ou eli yo Kamusela woshikandjohoololo Omulonga Erickson Ndawanifa naye okwa twa kumwe na Ngoloneya, ashike okwa wedako kutya oku ha kwatafana nawa moikadjo yepangelo osho shimwe shomoimbide tai eta oku ha tula moilonga, oshoyo tashi lemaneke eepoloyeka depangelo. Okwa popya yo kutya oveta ipe yoku landa oinima oshoyo oku yandja omayakulo mepangelo nayo oya ninga endangalati linene mondjila yoku tula moilonga eepoloyeka dakula depangelo moshitukulwa. Otati opena omakwatafano aipa yeembwa pokati kombelewa yOhangwena oshoyo ombelewa yepangelo lopokati, nashi oshi li unene omulodi a kula ta lipo exumifikomesho moshitukulwa. Okwa ti eepoloyeka dimwe kwa li dili koshivalo membo leepoloyeka doshitukulwa Ohangwena oda kanamo nokuli membo omo nope hena etomeno lasha. Ndawanifa okwa popya kutya efimbo ola fika opo epangelo li kale la fikifwa koshiwana, oitukulwa ikale ina eenghono noimaliwa yayo vene yomaxumifokomesho moitukulwa yavo.
Hearther Sibungo oye ali omunashipundi wokangudumutima komutumba wopashiwana nokwa enda pamwe naAnnakletha Sikerete, Loide Shinavene oshoyo Elifas Dingara. Ova talelapo eepoloyeka ngaashi, eepoloyeka domeva ohanya kokongo, Ongenga oshoyo Omungwelume, nova talelapo ondjila ipe opo ya yeululwa okudja  kOkatana, Endola fiyo Onhuno moshitukulwa Ohangwena.


Staff Reporter
2019-05-31 11:39:41 5 months ago

Be the first to post a comment...

You might also like...