• December 18th, 2018
Login / Register

Eindilo tango manga inaamu hokanathana… Othanekwaveta ompe osho yi li ngaaka



WINDHOEK – Omathimbo sho taga lunduluka, niinima oyindji otayi ende wo tayi lunduluka. Mathimbo  hamale aantu mboka ya hala okuhokanathana otaya ka pulwa ya ninge omaindilo tango, ngele othanekwaveta tayi ungaungwa nayo ngashingeyi oya piti kiilolelo ayihe inaamu ningwa omalunduluko omanene. Oveta ndjika otayi ka pula wo aantu mboka ye li pokati koomvula 18-21 ya kale ye na epitikilo lyaakuluntu yawo manga inaaya hokanathana. Othanekwaveta ndjika oyi li momake gokabinete, shi ikwatelela kOmupeviminista gwOmauyelele nOmakwatathano, Engel Nawatiseb.

Okabinete ngashingeyi oka fala othanekwaveta ndjika kokangundu taka ithanwa Cabinet Committee on Legislation (CCL) opo ku ningwe omasinanano osho wo omagwedhelopo, omanga inaayi ka tompathanwa momutumba gwopashigwana.
Mokuninga eindilo opo wu hokane, oveta otayi ka kwathela mokudhimbulula nokutotha mo okuhokana nomuntu a hokana/hokanwa nale, okuhokanwa molwa omuntu a hala uuwanawa ngaashi uuthemba woshilongo osho wo yilwe.
 “Ou na okuninga eindilo, tse tatu shi tula miikundaneki opo kehe gumwe a kale e shi shi kutya oto hombola na kape na omaimbo gokukeelela ondjokana yoye,” Minista gwIikwameni yOshilongo Frans Kapofi osho a ti ngaaka. Ta ti aantu otaya ka ninga omaindilo okupitila maanambelewa yoondjokana muuministeli mbuka nenge kukehe ngoka ta ka kala a tseyithwa kutya oku na uuthemba mbuka paveta.

“Sho to ningi eindilo, otali ka tulwa moshigwana, ehalo lyoye otali ka kala lya tseyika kwaayehe nongele ope na omuntu ngoka e li ompinge…, oshoka aantu yamwe oya hokana nale,” Minista ta fatulula.

Kapofi ta popi kutya poompito mpoka omukwiilongo a hala ondjokana, otaya ka pumbwa oondokumende tadhi zi koshilongo she ndhoka tadhi koleke kutya kape na omaimbo a yambekelwe ondjokana ye muka. Ta ti mongashingeyi mboka ya hala okuhokanathana ohaya ningi ashike omatseyitho gawo, taya yi kombelewa yomuhokanithi nenge ongeleka ya shangithwe yo ya ka hokanathane nawa konima yethimbo.

Ta tsikile kutya oveta otayi ka pula mboka ye li pokati koomvula 18-21 ya pewe epitikilo lyaakuntu.
“Ito vulu  ashike okuthikama ndele to ti oto ka hokana- ngele ou li pokati koomvula ndhika owa pumbwa ezimino lyaakuluntu yoye naanambelewa naya kale ya yelelwa nawa kutya owa pewa epitikilo ndyoka,” Ta ti ngaaka.
Kapofi ta ti shika kasha shi engambeko ashike okutula po ashike elandulathano .

Onziililo yoveta oyo ndjika kutya Oveta yondjokana onti-25 yo1962 oya li ya thigululwa kuSouth Africa pemanguluko lya Namibia na itayi tala omashongo galwe ngoka ga taalela Namibia.


Staff Reporter
2018-11-30 11:39:01 18 days ago

Be the first to post a comment...

You might also like...