• September 22nd, 2020
Login / Register

Elcin a yambidhidha oshitopolwa shErongo


ONGWEDIVA - Omagongalo gaElcin monooli pamuhanga, oga gandja omakwatho koshitopolwa shErongo. Ololi ya humbata iizalomwa, uusila, omatanga nomakunde, oya li ya thiki pongeleka yaElcin mOmbaye ohela. Oyendji ye na aapambele yawo ya patelwa kErongo, oya li ya gandja  omakwatho gawo ga endela pamwe niigandjwa ya gongelwa komagongola agehe gaElcin monooli.  Omusitagongalo gongeleki Ongwediva Elcin, Nehemia Sheefeni okwa ti omakwatho agehe kumwe oga pita pootona 10. 

Ta ti, ota pandula kehe ngoka a yambidhidha nokashona a gandja, yi ka hupithe oshitopolwa shErongo shoka sha taalelwa unene komukithi nguka gwa kanithitha oyendji iiyemo. “Omagongalo gaElcin monooli oga li ga gongala, e taga kundathana nkene tu na okukwatha nokuyambidhidha aamwameme ya patelwa kErongo omolwomukithi  ngoka gwa ponekele oshitopolwa shoka,” Sheefeni ta ti ngaaka.
Ta ti, iikulya mbyoka ya gandjwa, oya nuninwa oshitopolwa ashihe shErongo, unene mboka yakanitha iiyemo yawo oshowo aakalamo yomolukanda Otweya, kwali lwa tseyika nawa nale Twaloloka mOmbaye ndoka lwapipo thiluthilu omwedhi gwa ziko. Aakalimo oyendji oyakanitha iinima yawo, mwakwatelwa iizalomwa niikulya  mbyoka omagongalo ga yambidhidha nayo. “Ehangano lyoNamibia fish consumption promotion trust, olyetu iyambele okufala omakwatho agehe ga gandjwa koshigwana okuya koshitopolwa shErongo. Ololi ndjika oya kwathele natango okuthikitha ayihe yali ya tumwa okuza koonoli yifalwe kaapambele yawo, mboka ya kala ethimbo yeli muupyakadhi noya limbililwa nkene yena okugandja omakwatho kaakwanezimo yawo yapatelwako.

Sheefeni okwa kumagidha oshigwana kaashi mbandale, e tashi taamba ko omukithi nguka. Ta ti, omukithi nguka ogwe ya ngaashi omikithi omikwawo dhe yile. Ogu na okufaalela oomwenyo dhimwe ihe haadhihe, onkene ayihe nayi tulwe miikaha yaPamba. “Moshilongo muka omwali mwe ya iita, ya faalele oomwenyo odhindji, ihe naashiingeyi oya hula po. Natu itaale kutya esiku limwe tali ke ya, omukithi gwoCovid-19 otagu ka hulako,” Sheefeni ta ti ngaaka. Johanna Nembiya gumwe gwaamboka ya patelwa kOmbaye, okwa ti oya humbata omawudhigu komitima, ihe kaye na mpo taye wu popi. 

Ta ti, oyendji iilonga yawo oyakana, omolwa omukithi nguka. Ohaya zi moohila nooyene yomahala otaya pula iimaliwa yawo ethimbo kehe.
“Se katuna we mpa tatu kutha iimaliwa yokufuta oohila oshoka iilonga oyakana. Komagumbo itatu vulu okushuna, oshoka otwa patelwamo. Ano ota tu ningi ngiini? Ondina oomwedhi dhili ndatu konima inaandifuta,” Nembiya ta nyenyeta. Nembiya okwati, oya pandula komayambidhidho agehe gazi konooli. Ta ti oshigwana otashi ulike lela kutya oshiyana komitima.
Iiwike Iyali ya piti ehangano lyoKwafela Oshiwana monooli okw ali lya tumu oololi mbali dhi na uusila, omatanga omakunde, omahanda nosho tuu ya gandjwa koshigwana shokonooli okuza kiitopolwa ya yooloka. 


Victoria Kaapanda
2020-08-07 11:37:42 1 months ago

Be the first to post a comment...