• April 25th, 2019
Login / Register

Elly-Boy a pititha oalbuma yotango pamwe nehangano



WINDHOEK-Omwiimbi ngoka opo a holoka mehangano lyoongalo gwedhina Elly-Boy, osho a ulike uunongo we neholokopo lyoalbuma ye ompe oshiwike sha piti. 

Nomusholondondo gwoongalo dhe oompe, Elly-Boy ina kwata ko ashike aaholi yoongalo dhomoshilongo, ashike okwe ya pa omukumo noku ya ulikila kutya ngele otashi ya pokulonga nuudhiginini, ye ota vulu oku eta po sha. 

Oalbuma ye ndjoka opo ya piti yedhina Welcome Me, Elly-Boy okwa ti okwa li a hala opo aantu ayehe moshilongo okuza kaaningi yomikwelengendjo naapulakeni ayehe, ye mu taambe ko onga omuhikingalo omupe moshilongo nomake ga shambakana. 

Oalbuma yaElly-Boy oyi na oongalo 15, mwa kwatelwa ndhoka ndatu e li a kwathelwa kaahikingalo ya yoolokathana ngaashi Zowie, Kamambodi, Beix naF.T.

Elly-Boy oku li ishewe e na ehangano lyoongalo lye yemwene lyedhina Checka Daar Records, moka omo e li a ningila oongalo dhe adhihe. Checka Daar Records, ehangano lyoongalo ndyoka lyi li moTsumeb, naElly-Boy oku li a shaina omuhikingalo Doxcy. 

“Ondi li natango nda hala okushaina aahikingalo aape, unene mboka aashona ye na iitalenti ashike oya nyengwa  okutota po omaimbilo gawo omolwompumbwe yoshimaliwa,” Elly-Boy ta ti ngaaka. 

Okwa gwedha po ta ti elalakano okwa hala okuyambula po ehangano lyoongalo moshilongo. Kombinga yoalbuma ye, Elly-Boy okwa kwatela mo omilyo adhihe dhoongalo, opo aantu ayehe ya inyanyudhe kehe noongalo ndhoka ye hole. 
Elly-Boy okwa gwedha po ishewe ta ti ngaashingeyi oku li a tameka nale nokushanga omaimbilo gwoalbuma ontiyali, notayi ka kala ya dhenga mbanda yi vule ndjoka yotango. Oalbuma otayi ka pita muDesemba, naElly-Boy okwa hala oku ka imba naahikingalo oyendji yomoshilongo, aashona naanene omvula ndjika. 


Pinehas Nakaziko
2019-02-08 13:24:27 2 months ago

Be the first to post a comment...

You might also like...