• November 14th, 2019
Login / Register

Ethaneko lyenene-dhilaadhilo lyoNooli lya yi miilonga


Victoria Kaapanda

ONGWEDIVA – Iitopolwa ine konooli Etine lya za ko oya patulula pambelewa ethaneko lyenene-dhilaadhilo ndjoka lya kala poshitaafula oku za mo2015.

Moshipopiwa she shoka sha leshwa ku minister gwopevi gwIilonga James Sankwasa, Minista gwomayambulepo gomikunda niilando Peya Mushelenga  okwa ti ethaneko lyenene-dhilaadhilo ndjoka otali ka ulika nkene omakwatathano goopate taga ka tungwa miitopolwa ngaashi Oshikoto, Ohangwena, Oshana nOmusati.  

“Oshi shiwike nawa kutya omahala gaayendi yokolupadhi nuundjila mboka hau endwa okuza komalukalwa noku ya koositola, koosikola, nokomahala gomainyanyudhilo nkene wa kala iha u silwa oshimpwiyu, unene ngaa miitopolwa mbino yokonooli,” ta ti ngaaka. 

Omukuluntu koshikondo shiiyendifo nooveta dhi na sha noondjila Cedric Limbo oye a li a ulika ethaneko lyenene dhilaadhilo ndjoka.

Limbo okwa ti ethaneko lyenene dhilaadhilo olya li lya manithwa sha landula omapekapeko naadhani yonkandangala mboka ye na mo sha moshinyangadhalwa moka, ngaashi omalelo gopitopolwa nosho wo ehangano lyoMotor Vehicle Accident (MVA) Fund.

Oshimaliwa shoobiliona dhili N$12, 8 osha tokolwa opo shi ka longithwe mokutsitha ethaneko lyenene dhilaadhilo ndjoka. 

“Ethaneko lyenene dhilaadhilo ota li ka shilipaleka kutya oondjila miitopolwa ine konooli odha manguluka naalongithi yadho oya gamenwa nota dhi ka kwathela woo oongeshefa dhi kale tadhi adhikwa nuupu kaalandi,” ta gwedha po.

Elalakano olyo oku kandula po omukundu gwomalweendo moshitopulwa, uule gwomimvo 20 komeho.   
“Otatu ka tsikila oku kala mekwatathano naadhaninkandangala moshinima muka opo tu shilipaleke kutya oompumbwe dhaantu odha silwa oshimpuyu, naakalimo miitukulwa mbika oya nkondopekwa,” Limbo ta ti. 


Staff Reporter
2019-07-30 07:07:31 3 months ago

Be the first to post a comment...

You might also like...