• November 26th, 2020
Login / Register

Fishrot: Tate Mike anuwa okwafa a lungu ta ilatha



WINDHOEK- Ngoka ali nale omukuluntu gwehangano Fishcor okwa holoka ohela komeho yaMangestalata, a ningi gumwe gwomwaamboka taya pangulilwa iikulumuna yokulunga itapula ya pewa oshilukadhina Fishrot. Mike Nghipunya okwa li a kwatwa po kolutu ndoka halu ungaunga noku konaakona iipotha yokulunga iityapula moshilongo (ACC), a gwedha komuyalu gwayakwao mboka ya ningi omasiku mondjedhililo taya tamanekelwa oshipotha shokulunga itapula, nokudhengela odhi pesho moshikonga shoohi.Nghipunya ngoka a kala ta nyikwa-nyikwa okwali a kuthwa miilonga pakathimbo sho ashike kwafekelwa kutya moshimpungu shoohi noonzodhomefita omuna yamwe taya taamba oombumbo.

Ngashingeyi omuyalu gwaafekelwa ogwa londa na oguli paantu yeli ya heyali mboka anuwa ya tambula oombumbo oku za kehangano lyoko Island lyedhina Samherji ndyoka anuwa lyeya futu opo li pewe oshipambu oshinene moku yula oohi mefuta lyaNamibia. Omushangwa ngoka gwa nyolwa koACC oya  hokolola kutya Nghipunya okwali tango a ithanwa opo a pulaapulwe shinasha niimaliwa mbyoka nokonima sho aakonaakoni ya mono uuyelele mboka yali taya kongo oya momo kutya oshili mondjila oku kala ya tula omulumentu ngoka konima yekumba. Oominista oonkulu dhili mbali noshowo aakwashigwana yane oya holoka mompangu ohela shinasha nokulunga itapula sho anuwa ya futwa pambambo oya kalekwa modholongo sigo onena . Minista kwali yUuyuki Sacky Shanghala, Minista kwali Bernard Esau, omunashipundi  gwehangano  lyedhina Fishing Corporation  of Namibia Board James Hatuikulipi  oyali ya mangwa po omumvo gwa zi ko  sho aniwa ya li ya pewa iimaliwa yivulithe poomiliona N$150. Mboka woo oyali ya mangwa po nayakwawo ya tatu Tamson Hatuikulipi, Ricardo Gustavo noshowo Pius Taxa Mwatelulo  ayehe oyali ya hokololwa aniwa ya futwa pambambo opo ya kale ya gandja uuthemba weyulo lyoohi koocompani dhoka dhokondje yoshilongo.  Aaleli mboka yali ya inekelwa koshigwana oya li nduno ya yambululwa kiikundaneki yopauyuni ya ulikwa muvideo taya pewa iimaliwa mbyoka naasho taya yi moonghundathana dhoka kutya otaya ta mbula iimaliwa.


Loide Jason
2020-02-19 09:09:29 9 months ago

Be the first to post a comment...