• February 22nd, 2019
Login / Register

Fye kOuhamba waAngola katu na ko sha –Nelulu



ONGWEDIVA-Omanga vamwe moAngola va pandula euliko laJeronimo Haleinge onga ohamba yOukwanyama, epata leehamba daUkwanyama naavo ve li shii nawa ove mu li kanyuna tava ti ke shi ohamba, ina dalwa mepata leehamba. 
Va li epangelo laAngola nalo ola anya oku mu tambula ko, nefiku lenangeko laye oikundaneki aishe oya li ya keelelwa opo i nyanyangide sha shi na sha nevaeko laHaleinge ongohamba yaUkwanyama moAngola. 

Koshivilo shedimbuluko sheedula 102 shaMandume osho sha li kOihole mEtitatu loshivike eshi nako Haleinge ka li a ufanwa ko, nepangelo loshilongo shaye ola li la ifana ohamba Martha Mwadinomho yaKristian Nelumbu oye a ka kalele po Ouhamba waUkwanyama.  

Omupopiliko wOuhamba waUkwanyama Elenga George Nelulu okwa ti Ohamba yaUkwanyama Martha Mwadinomho Kristian Nelumbu ina pamba nande Haleinge nElelo laUkwanyama moNamibia kali na sha nande neuliko laye. 
“Fye inatu kwatwa ko sha keuliko laye, inatu yambidida ko sha. Oyo oilonga yaye mwene (Hailenge), noshilongo shaye,” Nelulu ta ti.

Ohamba Mwadinomho Omukwanangobe kepata, a dja mepata lohamba Mandume yaNdemufayo, omanga Hailenge Omukwamhalanga, navamwe vomOvakwanyama vomoAngola otava ti omidi daye oda fa dihe fi dOvakwanyama.
“Eehamba dauKwanyama Ovakwanangobe. Yee Hailenge otaka enda ngahelipi a ninge ohamba ngeenge kefi Omukwanangobe?” Osho Tomas Shapwanale omukwashiwana wAngola ta yambidia epata leehamba a li a pula. 
“Shotete keshi womedimo leehamba, oshitivali eehamba dOvakwanyama ohadi ulikwa mepata, ihadi hoololwa ngaashi yee a hoololwa komalenga,” Shapwanale ta ti. 

Shapwanale ta ti Hailenge ke na naanaa omakanghameno kutya omolwashike e udite kutya omolwa  shike e na okuninga ohamba. 

Haleinge okwa li govena wopedu woshitukulwa shaCunene, omanga omukadi a li oshilyo shopaliamente moAngola. 
Shapwanale aveshe naNelulu ova koleka kutya elelo laUkwanyama ola tokola opo mepata leehamba daUkwanyama mu hoololwe ohamba i kale moAngola, nokwa dilaadilwa opo David Lomboleni Mandume oye a ninge ohamba yaUkwanyama kombinga yokoAngola, omanga ohamba Mwadinomho tai kala moNamibia. 

Shapwanale ta ti Oukwanyama aushe umwe, ashike oshilongo shaUkwanyama paife osha tukulwa keengaba dopapolitika nokashipu vali ohamba i kale tai pangele moilongo ivali. Onghee osha pumbiwa opo pa kale eehamba mbali imwe omoAngola imwe omoNamibia tadi longele kumwe. 

Umwe womovashiivi nawa woinima yopamifyuululwakalo okwa yelifa kutya kashi fi shipe ngeenge omuhoko wonhumba u na eehamba mbali. Ta ti ohashi li kundwa ashike mepata leehamba  kutya ombala ei ya kula otai kala ilipi po. 
Ta ti, ngeenge ohamba Mwadinomho oya kala oyo aike, shotete eeveta doilongo ivali tadi wilike omalelo opamifyuululwakalo ina di lifa. Oshitivali, otashi ka kala shidjuu kohamba Mwadinomho okuongela oifendela moAngola, ye ota ka kala e na oudjuu ngee tashi uya kokuulika omalenga. 

Ashike vamwe vomovayambididi vaHaleinge otava ti Haleinge okwa ulikwa palandulafano ye vali okwa dja mulimwe lomomapata eehamba daUkwanyama. 

“Vati owoludi laHaikukutu yaShinangolo,” osho umwe wovayambididi vaHaleinge a ti. 
Ashike omuyambididi oo ta ti yee okwa hafa shaashi Haleinge a ninga ohamba, kali ta dulu okunyamukula kepulo ngeenge Oukwanyama owa pangelwa komapata avali.
“Ame kandi shi shi nee osho. Ondi shi ashike kutya Haleinge okwa hoololwa nokovakalelipo vepangelo. 


New Era Reporter
2019-02-08 13:12:31 14 days ago

Be the first to post a comment...

You might also like...