• November 14th, 2019
Login / Register

GIPF a patulula Ombelewa ipe mEenhana


Lasarus Hakwaake

Eenhana – Ovakalimo vomoshitukulwa Ohangwena otava yolele ketayo eshi ombelewa yeependjela dovailonga vepangelo ya patululwa mEenhana tai hangika momatungo Onawa mepandavanda Harelbeke. 

Epatululo eli ola ningwa kuJohaness Hakanyome, Kamusela woshikandjohoololo Ohangwena ponhele yaNgoloneya Usko Nghaamwa. Eshi a lesha oshipopiwa shangoloneya, Hakanyome okwa ulika ehafo lokomutima linene kutya epatuluko lombelewa ei osha xulifa po oku enda oinano ile yeekilometa 210 yovakwashiwana okudja Okongo, Eenhana oshoyo  Helao Nafidi oku ka konga omayakulo kombelewa yoGIPF yopopepi ei  i li koshitukulwa Oshana. Okwa holola kutya ovakwashiwana ova enda oinano ile, va enda omaufiku nokuhakofa nawa oshoyo va nangala peenhele inadi filwa nawa oshisho opo va shiive va pewe omayakulo. Okwa ti eshi oshi li ehafo unene eshi ombelewa yoGIPF ya patululwa opo ku dulwe ku yakulwe ovanhu konyala ve fike po 24 193, ovayakuli meembelewa depangelo oshoyo ava hava mono omayakulo okudja kombelewa yoGIPF, ngaashi oilyo yavo, ovafiyekadi, ovafilwalume oshoyo ounona veefiye.

Okwa pandula yoGIPF eshi tayi tula eenghendabala depangelo moilonga yoHarambee oyo i li ongudi yokunawapaleka onghalo yoshiwana, mokuxumifakomesho oshiwana oshoyo oku eta omayakulo e lili nokulili mekove lovakwashiwana. Oku li yoo a mbekulwa unene keenghendabala dehangano dokulongikida omadu nokutungila oilyo yavo omaumbo. Osha hololwa kutya ehangano loGIPF ola pungula emiliyona N$17,4 opo ku ka tungwe omaumbo avo ve na oyuuyemo yopedu efike 271, oo kwa talika kutya otaa ka shunifa omhumbwe yomaumbo pedu moshikutulwa Ohangwena. Okwa xulifa noitya yaTom Wilson oyo taiti “Vahapu vomufye otava dulu sha ve dule vamwe vomufye, ashike kape na umwe womufye ta dulu sha shi dule atushe,” tashi ti kutya ovanhu ova pumbwa okulongela kumwe nokuninga ongudi imwe opo va hange oilalakanenwa noishonekwa yokushakenifa omayakulo oshiwana moshitopolwa. 

Ponhele yombelewa yoGIP Gomms Menette, omunashipundi welelo loGIPF oye a popya kutya omadiladilo okupatulula ombelewa mEenhana okwa pendulwa unene komwaalu wovayakulwa oo tau kulu unene moshitopolwa. Okwa popya kutya “eembwa da kwata odeni nye dimbweni oku enda onaino ile yoku ya kOndangwa ile kOshakati shaashi omayakulo okwa etwa konhu koluvanda leni.”Okwa popya kutya ombelewa ipe otai ka yandja omayakulo ngaashi: omapulo e na sha nopendjela yoilyo yayo, omauyelele a fimana e na sha nopendjela, okushangifa oshoyo okukwashilipaleka ngeenge ou li tu moshikefa shopendjela oshoyo okuyandja omauyelele aeshe omauwanawa oshoyo okutala omapungulo oye nokuyandja omikanda keshe tadi pumbuwa.

Oshitayi shombelewa yoGIPF osha tamekele okuyakula mo 22 January 2019 mekwatelo komesho lovapiya ovandjungu Gustav Kalimbo ta yambidwa kuVeronica Ashipala. Nonande tava monika vafa vanini, vamwe vomuvo otava ka etwa umwe na umwe ngeenge omhumbwe ya holoka po. Ombelewa otai kala hai patuluka okudja Omaandaxa fiyo Etitano okudja po 08:00 yongula fiyo 16:30 komatango otai kala ya pata momaxuliloshivike nomomafudo oshiwana.


New Era Reporter
2019-03-01 12:45:13 8 months ago

Be the first to post a comment...

You might also like...