• October 25th, 2020
Login / Register

Govid-19: Osikola ya pata sho omulongwa a hiile omate mokalasa


Omulonga ngoka a hiile omate kiipundi niitafula oshowo komiyelo dhongulu yawo  posikola Mupewa Combined moshitopolwa shaShikuku, okwa patitha  oondondo 11 pakathimbo omolwa uutile nokukeelela etendalo lyomukithi gwoCovid-19.
Omulongwa ngoka ta ku ti okuume kopothingo komulumentu a monika omukithi gwoCovid -19 oshiwike sha zi ko gwo moshitopolwa moka. Otaku hokololwa kutya oya kala taya shingile pamwe omasiku ogendji, naashoka oshali sha mbandaleke osikola ndyoka ya patwa pakathimbo.
Omukuluntusikola posikola poMupewa combined, Steven Nelumbu, okwali a yelelithile Kundana kutya, osikola ndjoka kayi na oshipotha shoCovid-19, ashike oya tegelela omayamukulo gomulongwa ngoka a ningi oshinima shoka. 

“Sho twali twa mono uuyelele kutya omulongwa ngoka eli mongundu 11, okwali mekwatathano naangoka amonika omukithi ngoka, oshali shetu thiminike opo tu ke mu konaakonithe, nangaashi ngeyi otwa tegelela omayamukulo,” Nelumbu ta ti ngaaka. Ta hokolola ta ti, aalongwa ooyakwawo oyaka lopota kutya omulongwa ngoka ongula sho a thiki posikola okwali ta hiile omate kiipundi niitafulo oshowo koshikwatitho shomuyelo.

Nelumbu ta ti, shoka sha ningwa komulongwa osha nika oshiponga, oshoka ka ye shi mpoka a thikama. Otashi vulu okutula oomwenyo dhoyendji yeli momudhingoloko gwosikola moshiponga.
“Katu na natango uyelele wa ihwa po kutya okwa ninga mo shike momudhingoloko gwosikola,  ngele okuna elalakano lyasha. Oshoka otaku hokololwa kutya okwali a kala ethimbo kuundjugo wosikola,” Nelumbu ta ti ngaaka.

Ta gwedha po  ta ti, pethimbo ndika ita vulu okugandja uyelele kutya omulongwa otaka pewa egeelo lya tya  ngiini, sha ikolela kwaashoka a ningi, ashike osikola oy ina omalandulathano haga landulwa uuna omulongwa alonga iilonga yili ompinge nosikola. Omukuluntusikola okwati ngele omayamukulo oga zi mo kutya okuna omukithi gwoCovid -19, Omukuluntu gwelongo moshitopolwa shaMusati oye taka gandja uuyelele wonkatu ya landulako. “Otwali twa kambadhala okutsinina oongulu dhoka dha hiilwa omate, pethimbo ndoka twali twe shi lopotelwa,” Nelumbu a popi ngaaka. Okwa yelitha kutya osikola ayihe inayi pata ihe oondondo 11, odho ashike dha kalekwa komagumbo omanga ya tegelela omayamukulo.
 Oongundu okuza koshikunino sigo ondondo ontimugoyi, ohayi yi kosikola oshoka oongulu dhawo odhi ili ko kule noondondo 11.


Victoria Kaapanda
2020-07-30 11:46:17 2 months ago

Be the first to post a comment...