• April 25th, 2019
Login / Register

Gumwe a dhipagwa sho taya kondjele pomasiga


WINDHOEK- Aakalimo yomOntokolo moshikandjohogololo shOnesi oya haluthwa konkundana yomulumentu gwomimvo 22 ngoka a dhipaga mukwawo sho ya li taya kondjele pomasiga.

Oshiningwanima shika osha holoka potundi 12 yuusiku okupendukila Etitatu lyoshiwike shika. Osha ningilwa nduno polukanda lwedhila Epalela pOntokolo moshitopolwa shaMusati.

Omupopiliko gwOpolisi mOmusati, Inspekta Lineekela Shikongo okwa hokolola kutya oshiningwanima oshikumithi osha holoka sho mboka yaali oya li taya nyenyetele pomasiga mpoka opo ya teleke oshithima.
Shikongo okwa hokolola kutya omutamanekwa ngoka e na omimvo 22 okwa tsu kuume ko ngoka ya li haya zi mombashu yimwe naye iikando yi li itatu nombele e mu tsile mpoka.

Shikongo okwa ti nonando opolisi oyi li natango yi ipyakidhila nomakonaakono okwa ti kutya nakusa ngoka e li omukwashigwana gwaAngola oku na 29, nokwa hulitha mbala sho a tsuwa nombele iikando iyali montulo, noshikando shimwe mombunda.

“ Mbaka aniwa oya li taya nyenyeta mondunda moka ye li haya zi ayehe, taya kondjele peziko mpoka ya li aniwa ya hala okuteleka iikulya,” osho Shikongo a hokololele omutoolinkundana nguka.
Okwa ti kutya omakonaakono gopolisi oge li metifa moshiningwanima shika nomutamanekwa nguka e li omvalele yOmuthitugwanandjamba okwa kwatwa po nokwa tegelelwa a holoke mompangu yaMangestalata mOutapi pokati kEtitatu nonena(mEtitano).

Shikongo okwa hokolola kutya nuumvo shika oshiningwanima oshitine moshitopolwa shika tashi holoka okuza kuJanuali.
“Aakashigwana yetu oya simaneka unene okuya noombele koondingosho onkene oombele odhindji odha li dha kwatwa po kopolisi okuza kaakwashigwana mbaka pethimbo lyoshikonga shopolisi shedhina Hornkranz shoka sha li sha ningi ko omasiku notashi tsikile ,” osho a hokolola ngaaka.


Loide Jason
2019-04-05 12:35:47 20 days ago

Be the first to post a comment...