• May 31st, 2020
Login / Register

Gumwe a sa sho a pauka mokambautu kOkatyali



Omulumentu omunahambo okwa si eso linyanyalitha sho a koyina kohi yomeya omanga a li ta taaguluka omulonga ngoka gu li mOkashana nokambautu hoka taka longithwa okutaaguluka omulonga ngoka molwefundja ndyoka lyi li moshikandjohogololo shoka.

Kansela gwoshikandjohogololo Okatyali Joseph Mupetami ota indile aakwashigwana ya kwathele mokukonga olutu lwanakusa ndoka lwa ya nomeya oshoka ngashiingeyi kalu wetike ko oku na omeya ogendji. Mupetami ngoka a popi moradio okwa hokolola kutya oshikandjohogololo shoka oshi na omeya unene notashi ka kala oshidhigu moku ka konga omudhimba ngoka. Okwa hokolola kutya omulumentu nguka okwa li nayakwawo mboka woo ya li taya litha iimuna ashike ye okwa puguma po puyakwawo. Oshiningwanima shoka osha li sha holoka mOsondaaha yehuliloshiwike ndika.

Omwedhi gwa zi ko ngoloneya gwaShana Elia Irimari okwa  talele po omahala ngoka ga kondekelwa kombinga yimwe komeya, ngaashi sha li sha popiwa kukansela gwoshikandjohogololo shaKatyali Joseph Mupetami  mokateyipa ke li komalungula.

Mupetami okwa ti aanafaalama moshikandjohogololo she, oya kondekelwa komeya kombinga yimwe, onkene ohaya ningi onkambadhala opo ye ya yambidhidhe nuusila, omiti naashihe taya pumbwa oshoka itaya vulu okupita omulonga gwomeya.

Kansela okwa ti okwa li a kutha olweendo lwowina opo a ka tale nomeho omeya ngoka ga kondekela ko aanafalama, opo a kale e shi shi kutya omalandulathano genipo taya ka tula po oshowo ashuwe kutya aahingi yokambawutu oye li mekwatathano lyi li ngiini naayakulwa. “Omulonga nguka ogwa ya muule unene, go gu na oomita dha pita pune. Oshinima shika kasha shi elozi nenge ekango, ashike omulonga gowene.

Otwa mona omeya gefundja ngoka ga zi kiitopolwa ayihe iyali Omusati nOshana,” Mupetami a popi ngaaka.
Okwa gwedha po ta ti ekunkililo lye kaaniimuna okutulapo elandulathano ewanawa nkene taya kala taye ya faalele shoka ya pumbwa oshowo oku ya tala ngele oye li monkalo ombwaanawa.

Mupetami okwa ti otaya tsakaneke epangelo momashongo goludhi ngashi nduka. Ta ti epangelo sho ta li ka thika, oya longa nale ashihe taya vulu.

Ohaya longitha omataagulukitho okupita omulonga oshowo okuhumbata ashihe shoka taya faalele aanafalama. Kansela okwa ti omataagulukitho oye ga na ga gwana, shapo ongele taya yambidhidhwa niiti yokuundula omeya oshoka ngashiingeyi ohaya longitha iipokolo opo okambawutu ka ye komeho.
Mupetami okwa ti oshikandjohogololo she, osha ilongekidha okukwathela oshigwana mpoka tashi vulu.


Loide Jason
2020-02-18 08:44:53 3 months ago

Be the first to post a comment...