• November 26th, 2020
Login / Register

Hymn ta longekidha omadhewulo goondjimbolwiimbo



Victoria Kaapanda

ONGWEDIVA-Omunangeshefa Omunamibia gwehangano lyedhina Beyond  Horizon Investment cc, Ndali Nenkavu oshowo omwiimbi gomayimbilo gopambepo, ota ka dhewula kehe ongundulwiimbo yi na ehalo oku ka kutha ombinga momathigathano taga ka kala ko 25-26 April nuumvo.

Omadhewulo otaga ka ningwa momasiku 29 Febuluali numvoo mongeleka yaElcin mOngwediva. Omanga omadhewulo gwokoWindhoek omasiku otaga ka tseyithwa methimbo efupi.
Ethigathano lyomalwiimbo otali ka ningwa oshikando oshitiyali nuumvo, notali ka ningilwa moTrade Fair yaNgwediva.

 Nenkavu okwa ti okwategelela aayimbi yomalwiimbo oshowo aayimbi yomayimbilo gopambepo ya kale ya thika okuza koombinga noombinga adhihe dhoshilongo oshowo kehe ongundu ya ilongekidha ya hala okukutha ombinga.

“Onda ilongekidha oku ka dhewula omalwiimbo agehe, omayimbilo ge li gaali ngoka taya ka imba methigathano, naamboka taya ka imba nawa ngaashi naana nde ya dhewula nenge ya pitilila, oyo  aasindani,”Nenkavu ta ti ngaaka. Omadhewulo nomayishangitho okukutha ombinga momathigathana otaga ka ningwa oshali, omanga kehe ngoka ta ka pita omweelo gwoTrade Fair esiku lyomathigathano ota ka futa N$30.

 ‘Elalakano lyandje okuya po nedhilaadhilo ndino okukumagidha aalumentu aanyasha okukutha ombinga momalwiimbo ya ipyakidhile opo kaaya mone ompito yoombepo dha puka oshowo okuhulitha po omadhipagathano oshowo omahepeko ga taalela oshigwana mongashingeyi.”Nenkavu ta ti ngaaka.
Ta gwedha po ta ti oku na eyitaalo lela kutya okupitila momathigathano gomalwiimbo oyendji otaya vulu okuteka mo sha oshowo okutameka oondjimbolwiimbo ndhoka tadhi ya kaleke kokule niinima iiwinayi ya taalela oshigwana.

Ethigathano ndyoka tali ithanwa Hymn Awards otali ka kala lyi na oongundu dhi ili nodhi ili ndhoka tadhi ithanwa ‘Best female Solo, Best male solo oshowo Best Instrumentalist’.
Ope na omagano ga longekidhwa kaasindana okuza poshimaliwa N$10 000 sigo N$20 000.
Hymn Awards okwa gandja etumwalaka moshigwana kutya kehe ngoka ta vulu okuyambidhidha omalwiimbo ngoka ga ye komeho oshowo okugandja okashona hoka ye na po, unene aanangeshefa nomahangano omanene naya kale ya kwatathana naNenkavu konomola 081 258 1073. Oondjimbolwiimbo ndhoka dhi na uuCd nosho tuu oya manguluka okulanditha omasiku ngoka.
Omayishangitho oge li metifa natango.    


Staff Reporter
2020-02-28 09:50:52 8 months ago

Be the first to post a comment...