• January 27th, 2020
Login / Register

Iilyo yoFederation yili 122 otayi tungu omalukalwa gawo


Victoria Kaapanda

ONGWEDIVA-Iilyo yEhangano lyoShack Dwellers Federation yi li 122 oya tameke okutunga omagumbo gawo ngoka ga tegelelwa ga kale ga pwa momasiku 17 gaJanuali nuumvo kEhenye mOshakati.

Ehangano ndyoka kwa li lya gandja omikuli dhili kohi N$40 000 kiilyo yehangano ndyoka omvula ya zi ko muNovemba, olya ti kehe gumwe okwa pewa ashike oomwedhi ndatu a kale a mana okutunga egumbo lye pehala ndyoka a pewa.

Oyendji ya pewa ompito yomukuli, oyeli metata lyokumana okutunga, omanga yamwe ya mana okutunga nokufuta omukuli ngoka ya pewa kehangano. Nonande oya pewa omimvo 11 okushunitha omukuli ngoka.
Ooyene yomagumbo sho ya li ya talelelwa po kaakuluntu yehangano ndyoka osho wo kaakuluntu yomalelo gwondoolopa moshitopolwa shaShana oya li ya ulike enyanyu nolupandu sho ya mona omahala gawo yoyene.

Omukwatakanithi gwEhangano lyoFederation konooli Sophia Henock okwa ti ngashiingeyi omagumbo ge li 381 oga tungwa moshitopolwa shaShana okupitila mehangano ndika.

“Ehangano ndika ohali kwathele ashike aakwashigwana mboka ye na iiyemo iishona, ano yi li kohi N$4 000 nenge mboka ihaya longo ihe ohaya nyangadhala, opo ya mone ompito yokumona omagumbo gawo yoyene, oshoka omikuli dhoombanga ohadhi pula oshindji opo gumwe a mone omukuli gwegumbo,” Henock ta ti ngaaka.

Henock ta popi ta ti kehe gumwe oku na uuthemba nokwamanguluka okwiinyolitha a ninge oshilyo, opo a mone ompito yokumona ehala nenge egumbo lye mwene ethimbo nesiku kehe.

Ta gwedha po ta ti kape na shoka hashi pulwa opo gumwe a ninge oshilyo. Shoka sha pumbiwa, okutota po ashikwe ongundu yaantu mboka ye na ehalo  nelongelokumwe okugongala Osoondaha kehe, uule woomwedhi hamano okupewa omalongo nkene ofederation hayi longo. 

Nangula Monika Nanzila gumwe gwaa mboka ya pewa ehala lyokutunga egumbo lye okwa ti enyanyu e na sho a tala egumbo lye lyi li pokupwa enene noonkondo.

“Onda kala oomvula dhi vule 20 tandi hiila momagumbo gaantu, ihe nena onda mona ehala lyandje mwene. Iimaliwa mbyoka tandi ka futa komwedhi iihwepo yi vule mbyoka handi futu ngashiingeyi mohiila,” Manzila ta ti ngaaka.

Ta gwedha po ta ti oku na ashike omasiku omashona okuthika momasiku ngoka  egumbo kehe lya pewa lyi kale lya pwa, onkene naye okwa li a ikwetele ko kiilonga okuyambidhidha aatungi opo a adhike a mana okutunga momasiku ngoka ya lombwelwa.

Omukuluntu gwehangano ndyoka Heinrich Amushili okwa li a yelitha kutya kehe egumbo olya pumbwa okukala lya pwa okutungwa o square meta dh ili 32 momasiku 17 gomwedhi nguka.

“Kehe ngoka a hala okugwedhela egumbo lye, ota vulu okutsikila okutunga konima a mana okulonga egumbo ndyoka ya yambidhidhwa okutunga noshimaliwa shomukuli, opo a vule okutsikilako sigo oko square 64 niimaliwa yawo yene,”Amushili ta popi ngaaka.

Amushili okwa li a kumagidha ooyene yomagumbo ya kale haya futu omakwashilipaleko opo una mwene gwegumbo a hulu ko, itashi tula ngoka teke li thigululapo muupyakadhi okutsikila okufuta oongunga dhegumbo.     

 


Staff Reporter
2020-01-09 07:22:22 18 days ago

Be the first to post a comment...