• February 26th, 2020
Login / Register

Iimuna tayi tsikile okusa kondjala


Victoria Kaapanda 

ONGWEDIVA - “Onda hupula ngaa ne paife, shika osha ninga onkalondjigilile,” Nangula Mathias ta ti ngaaka a tala oongombe dhe dhi li mbali tadhi si kondjala Etitano lya zi ko momukunda Oshuulo mOshitopolwa shaShana.

Mathias ta ti iimuna ye nge tayi si ihashi mu uvitha we  nayi, ihe okwe shi taamba ko ashike, oshoka okwa kanitha iimuna ye oyindji omvula ndjika ya sa kondjala.

Kundana sho a li a pula kutya oshike ye na iimuna tayi si kondjala ngele epangelo olya gandja iikulya yiimuna yi topolwe momikunda adhihe moshilongo. Mathias okwa ti sigo onena ina mona iikulya yiimuna megumbo lye, okwa ti ye okwa lombwelwa kutya iikulya mbyoka otayi pewa ashike mboka ye na iimuna oyindji.

“Ihe shoka kandi wete shi li mondjila oshoka tse mba katu na iimuna oyindji itatu kwathelwa otatu kala po ashike nowala. Pehala otse tu kwathelwe tu kaleke po uumuna wetu mboka wu li po,” Mathias ta ti ngaaka.
Ta hokolola ta ti oongombe adhihe kumwe a kanitha omvula ndjika odhi li omulongo. Ta ti paife ngele a mono yimwe tayi kuutumba nokutindila mo momutumba, yo itayi etitha oonkondo, ohe yi dhipaga po ashike ee ta ka landitha onyama ye opo kaa kanenene.

Ta gwedha po ta ti nonande iimaliwa kwa li a landele oongombe dhe hayo ha mono ngele a ningi okapana nenge ta taambathi niilya (ohaha) oshihwepo ngaa shi vulithe  okukala ina mona po sha.

Mathias ta ti paife okuna po ashike oongombe dhi li ndatu, nonando adhihe kumwe odha li 13. Ta ti ota galikana omvula yi loke nawa natango pamwe ndhoka ndatu tadhi hupu ngaa ngele Pamba e shi hala.
“Uupyakadhi mbuka hangame ashike wa kwata momukunda gwandje, ngame ote ti hwepo nokuli, egumbo limwe olya kanitha oongombe 50 omanga ekwawo natango lya kanitha oongombe 50,” Mathias ta popi ngaaka. Okwa ti oya kala taya hupu nuudhigu, oomwidhi okulanda opo ya paluthe oongombe dhawo ogu na ondilo noshimaliwa shokulanda omwiidhi kasha po nando. Oyendji oya kala haya ka tala oomwiidhi komakuti ihe ngame inandi vula okuya ko oshoka kandi na oshitukutuku nongele wa kutha shimwe momutumba oto pulwa natango oshimaliwa opo wu falwe wu ka mwe omwiidhi goye mwene.

Ta popi a ikwata pombanda yomutse ta ti omvula ndjika nayi pwe ko shila oshoka omvula ndjika okwa li ombwiinayi ye ine yi mona nale. Ta ti iimuna otayi si naantu otaya si ondjala.

Ta ti iinima oyindji iiwinayi oya longwa momvula muka. Ta ti ashike ombepo kombinga ye otayi mu ulukile ngaa kutya omvula tayi ya otashi vulika yi kale ya yambekwa yo yi li nawa.


Staff Reporter
2019-12-05 09:18:33 2 months ago

Be the first to post a comment...

You might also like...