• November 13th, 2019
Login / Register

Iitopolwa yokondje yoWindhoek inayi ninga iiholameno yoongangala



WINDHOEK- Omukuluntu gwopolisi moshilongo Inspector General Sebastian Ndeitunga okwa ti kutya iitopolwa yopolisi mbyoka yi li kondje yoWindoek inayi ninga iiholameno yoongangala.

Ndeitunga okwa hokolola ndhika omanga a li ta popitha mboka ye li ombinga moshikonga shoku kondjitha iimbuluma mboka haya kwathelwa ketanga lyegameno lyoNDF noshowo opolisi yaMuni gwoWindhoek ndjoka yi shiwike nawa City Police moshilandopangelo ongula yEtitatu lyoshiwike shika.

Okwa hokolola kutya oongangala ngashingeyi odha tameka okukala dha thiga po oshilandopangelo tadhi yi kiitopolwa yimwe aniwa shaashi moshilando omu na Operation Kalahari.

“Shika oshikonga shoshilongo ashihe. Inamu etha nande ye ye hoka ya holame . Oshilongo ashihe nashi ya konge mo opo iimbuluma yi shune pevi. Inamu ningwa iiholameno,” osho omutse gwopolisi gwa hokolola ngaaka.

Okwa londodha woo aapolisi kutya naya kale taya ihumbata nawa oshoka okwa yematekwa komayihumbato gaapolisi mboka ya li kompangu hoka kwa holoka omukwiita ngoka a yaha nokudhipaga omuhingi gwotaksi mOvenduka omanga a li miilonga moshikonga osho tuu shoka.

“Okuza nena ndjika hamunambelewa gwopolisi nenge omukwiita ta yaha nenge ta umbu ondjembo mombanda omanga ina lombwelwa kokomanda. Osho a hokolola ngaaka omanga a taalela engathithi lyaamboka taya kutha ombinga moshikonga moka.

Ndeitunga okwa dhenge omuthindo kutya opolisi itayi ka idhidhimikila nande aantu mboka taya sheke oshikonga shika, oshoka mboka taye shi sheke oomboka aapiyaganeki.

“Naamboka ya etha omuniilonga pamwe natse a kuthwe omathano nuuvidio ngashingeyi oya ungaungwa nayo kokangundu ke na sha nomayihumbato miilonga. Naamboka taya ka endulula shika nena otaya ka ningwa sha faathana. Omuntu nguka okwa li miilonga naasho oshiningwanima sha holoka omupya ngaa nee. Ina monika ondjo sigo ongashingeyi onkene itatu vulu okumunyunina aakwashigwana ngaaka,” osho a londodha aapolisi ngaaka.

Okwa totha mo kutya ngashingeyi hela ngaa oshikonga shoka sha tamekele iimbuluma oyindji oya shuna pevi moshilongo ashihe. Tangotango opwa li pu na oshikonga tashi ithanwa Operation Hornkraz shoka sha lalekwa muNovemba omumvo gwa piti ihe ngashingeyi opu na nduno shoka tashi ithanwa Kalahari.

MuMaalitsa nuumvo iimbuluma oya li yi li po8,787 ashike shoKalahari sha tulwa miilonga muMai nuumvo iimbuluma mbyoka ya longwa moshilongo oya shuna pevi noyi li ashike po8,186 , shoka tashi ulike kutya oshikonga shika otashi longo nuudhiginini.


Loide Jason
2019-06-21 13:00:41 4 months ago

Be the first to post a comment...

You might also like...