• November 16th, 2019
Login / Register

Iyambo okwa li omwiifupupiki – Namoloh



WINDHOEK - Ominista yegameno moshilongo, Charles Namoloh okwa dhimbulukwa nakusa Nickey Iyambo onga omulumentu gwoshipapalutu omwiifupupiki,  nonando a adha onkatu yopombanda ngele otashi ya papolitika nuulongelwe. Iyambo okwa sile megumbo lye moEros ongula yosoondaha. Ta popi noshikundaneki shoNampa uusiku wOmaandaha, Namoloh okwa popi kutya Iyambo okwa li kuume ke kashili, omumwayina osho wo hailwa ngoka kee na okakombo noludhi.

“Ondjila yetu oya tameke moLubango moAngola momumvo 1981. Onda li tandi ehama nonda li tandi falwa kendiki lyuuhaku lyaakwiita yaNamibia, omuntu gwotango ngoka a yakula ndje oDr Nickey Iyambo,” Ta ti ngaaka.
Namoloh ta ti Iyambo okwa li e na uukwatya mbuka: Omugundjilintu, e na esimaneko, ha popi newi etalala osho ha longo nuudhiginini noneitulomo.

Ta ti ngele aagundjuka ope na shoka ye na okuteka mo muIyambo, okukala ye na esimaneko nande ya kale ye na omadhina moshigwana. Pehala opo tuu mpoka, Omukuluntu omukulu e li moshipundi shevululuko gwetanga lyegameno lyaNamibia, Martin Shali okwa li a totomona Iyambo onga ependa ndyoka lya kala mokukondjitha ehulithopo lyuukoloni okupitila muunongo we onga omundohotola gwopaunamiti.
Shalli ta ti aanyanyamagulu naya ende mondjila ndjoka, ndjoka ya kala ya palwa yi na okulongela oshilongo neitulemo osho wo eiyambulepo lye mwene.

Moomvula dho 1980, okwa li omukuluntu gwomayakulo gopaunamiti gopakwiita goSwapo osho wo poompito dhilwe, 
Okwa thiga ko omukulukadhi gwe, noyana yatano.

Nickey Iyambo okwa li omunapolitika nondohotola yopaunamiti nokwa a li a ningi omupevipresidente gwotango moNamibia okuza mo 2015 sigo 2018. Oshilyo shoSWAPO, Iyambo okwa kala oshilyo shokabinete okuza muMaalitsa 1990. Okwa li Ominista yuundjolowele okuza 1990-1996, Minista yomagumbo okuza mo 1996-2002, Ominista yiikwaminia noonkondo okuza 2002 sigo 2005, Ominista yUunamapya, Omeya nomakuti okuza 2005 sigo 2008, Ominista yegameno okuza 2008 sigo 2010 osho wo ominista yiipambele yoonakulwa aakulu okuza 2010. Okwa li a yi moshipundi shevululuko onga omupevipresidente mo2018 ashike onkene a kala natango omutse gUumisteli wiipambele yoonakulwa aakulu.

Eputuko nelongo

Iyambo okwa valelwa mOnayena moshitopolwa shaShikoto. Okwa mona oonzapo dhuulongelwe pankatu younivesti dhi li ine dha yooloka koUnivesity of Helsinki moFinland, a tameka noMSc mo 1969. Mo 1970 okwa li a mono oMA mopolitika, BA muunamiti mo 1974 osho wo MD muunamiti mo 1980. Pethimbo ti ilongo moHelsinki, Iyambo okwa li oshilyo shongongahangano yaanasikola osho wo omukalelipo gwoSwapo mounivesiti ya tumbulwa pombanda. Oya li mondunda yimwe yokulala momuhandjo naangoka e li omukuluntu gwombaanga yaFinland ngashingeyi, Erkki Liikanen.

Iilonga
Iyambo okwa li oye omukuluntu gwopoosa gwotango gwoshipa oshiluudhe moNamibia okuza mo 1962 sigo 1963 ashike okwa yi muupongekwa noSwapo mo 1964. Okwa li gumwe gwomiilyo yotango yoSwapo mbyoka ya ya muupongekwa nziya  nokukwathela okutula po ekwatathano ewananwa pokati koSwapo naTanzania.

Oshilongo sho sha manguluka muMaalitsa 1990, Iyambo okwa li a ningi ominista yuundjolowele nomayakulo goshigwana, moka a kala sigo omomumvo 1996. Okwa li ulikwa onga ominista yi na sha nomalelo gopaitopolwa nomagumbo okuza mo 1996 sigo 2002, Ominista yiikwamina noonkondo okuza 200-2005 osho wo ominista yuunamapya, omeya nomakuti okuza 2005 sigo 2008. Okwa li u likwa onga ominista yegameno momasiku 8 Apilili 2008. Konima yoomvula mbali popoosa mpoka okwa li nduno a ulikwa onga ominista yiipambele yoonakulwa aakulu mokabinete okatiyali kapresidente Hifikepunyee Pohamba, moka a kala ominista sigo 2010-2015. Okuza mo 2014 okwa kala oye oshilyo oshikuluntu moomvula megumbo lyopashigwana.

Pamwe naPresidente Hage Geingob, Iyambo okwa li a ganithilwa oshilonga she shuupevipresidente waNamibia mo 21 Maalitsa 2015, nokwa li oye omuntu gwotango a ulikwa popoosa ndjoka mondjokonona. Onga Omupevipresidente, okwa tsikile nokukala oye omutse gwoMisteli yiipambele yoonakulwa aakulu moka a kala e na aapehaminista yaali: Alexia Manombe-Ncube naRoyal |Ui|o|oo. 

MuFebululali gwo2018, Iyambo okwa li a thigi po oshipundi she shuupevipresidente omolwa onkalo ye yuukolele. Iyambo onkene tuu a tsikile okukala Ominista yoonakulu aakulu nokwa kala wo noshipundi she mopaliamende.
2011: Momasiku 18 Maalitsa 2011, Omupresidente gwaFinland Terja Halonen okwa li e mu pe oshishani shonkatu yoCommander, First Class, of the Order of the Lion of Finland.
2014: Mesiku lyomapendafule okwa li a pewa oshishani shonkatu yoMost Brilliant Order of the Sun, First Class.

Eso
Ongula yomasiku 19 Mai 2019, Omupresidente gwaNamibia Hage Geingob okwa li a tseyitha eso lyIyambo ngoka a sile megumbo lye moWindhoek, kwa li ashike ku na esiku a gwanithe oomvula 83.


Staff Reporter
2019-05-24 11:11:33 5 months ago

Be the first to post a comment...

You might also like...