• October 16th, 2019
Login / Register

Kamu na omalelo gaali goNFA mOshana - Nandago



Oshakati - Okatanga kokoompadhi mOshana oke li monkugo yi na onkambe konima sho yamwe yomaawiliki yoosipana dhimwe mooliha dhaNFA mOshana, ye li ya kutha mo dhawo noya hala okuumba ko elelo ekulu koshipundi, nokutula ko elelo epe.

Oohapu ndhika odha li dha kolekwa komunashipundi gwelelo lyaNFA ekulu mOshana Beatus Nandago “BK”.
“Opu na mboka ya hala okwiikuthila oveta ashike itaya piti oshoka elelo epe ndyoka tali fekelwa anuwa lya totwa mOshana inali tulwa koshiyalo keembonge dhaNFA onkene otaya mana po owala ethimbo lyawo niinima yaafele,” BK ta ti.
Okwa ti okatanga kokoompadhi moNamibia oke na ekotampango nomilandu na ihaka longo nuutangalali.

“Elelo lyaNFA moshana olya li lya hogolululwa nokupewa oonkondo muAguste gwo 2017 moka ngame nda li nda hogololwa opo ndi kale omunashipundi gwoNFA mOshana sigo omomumvo 2021,” BK ta tsikile.
Ta ti elelo lye olyi na natango oonkondo sigo ethimbo ndyoka ya uthwa ya kale mombelewa lya thiki pehulilo, onkene ongundu yaamboka yi itenda ko otayi longo yi li pondje yoveta.

“Oohapu dhelelo epe otu dhi shi naamboka ye lile elelo komeho out ya shi na opo haye ya poombonge dhaNFA mOshana taya kambadhala opo aanambelewa yoNFA anuwa ya tameke okulongela kumwe nayo ashike omupya omunene ogu li mpaka sho kapu na nande ogumwe e ya pulakene,” BK ta tsikile ko.

Oonkambadhala okumona omunashipundi gwelelo lyaayitendiko odha li dha hulile muunyengwi, osho wo dhokumona oombonge dhaNFA moWindhoek okumona uuyelele okuzilila koombinga dhiya mbali.
Ashike onzo yi shi kwiinekelwa ndjoka ya li ya kuthileko Kundana kombinga yonkalo ndjoka tayi inyenge mOshana oya li ya holola kutya elelo epe olya li lya hogololwa koosipana hetatu dhomOshana ndhoka dha li dha ningi oshigongi shopawulumompumbwe.

Ot ku hokololwa wo kutya olutu lwopakathimbo lwoNFA olwa hala opo iihokolola mbyoka yi li mOshana yi ka potokononwe okupitila momahogololo ngoka anuwa ga tengenekwa g aka kaleko konima yekopi lyoshifonkundana shoThe Namibian mboka tau ka kala ko pethimbo lyiituthi yaPaasa.

Nando opu na  omahokololo ga tya ngaaka ewiliko ekulu lyaNFA oli li lya kwata oshihingitho lwa pama nolyi li nokuli tali tula kumwe osipana yaamati ye li kohi yomimvo 20 kumwe ndjoka ya tegelelwa opo yi ka kuthe ombinga muudhano wekopi lyoThe Namibian Newpaper Cup.

BK Nandago okwa li a holola kutya oye li nale ya tula kumwe oshipandi shaamati 20 mboka ta ya upikwa komudhewuli Samuel Shaama opamwe naSam Nekwaya ngoka e li omukwateli komeho gwosheendo shoka ta shi ka wunga oontanda mondoolopa yaMariental moka taya ka tsa nokuthiminika opo ya tale ngele emanya otali gu.
 


Shipi Elago
2019-04-05 12:41:48 6 months ago

Be the first to post a comment...