• November 17th, 2019
Login / Register

Kape na uuyelele natango meyugo lyiimaliwa pomahooli mOkahao


Victoria Kaapanda

ONGWEDIVA-Aafuthi mboka ya yuga aaniilonga yopomahooli goEngine mOkahao Omaandaha goshiwike shika iimaliwa koomuma yi vule N$300 000 inaya monika natango.

Omugandjimulombo oshowo omupopiliko gwopolisi moshitopolwa shaMusati Liinekela Shikongo okwa ti oshiningwanima shono osha li sha holoka moshanga shomutenya, sho okahauto koka-VW Polo ka li ka tidha ohauto ndjoka yi na aaniilonga sigo ye yi piti noku yi thikama komeho ee tayi kankama.
Iimaliwa mbyoka okwa li tayi falwa kombaanga mOkahao.

“Aalumentu ye li yaali oya li ya nuka mohauto yoPolo, nokutatula mo ekende lyomwelo gwa nakuhinga, noya li ya yakula mo ondjato yi na iimaliwa yomwaalu ngoka gwa tumbulwa pombanda, ee taya shuna mohauto ndjoka ya zile nokuhinga ya thinda kombinga yaShakati,” Shikongo ta ti ngaaka.
Ta gwedha po ta ti ngeno okwa li oshiningwanima shoka sha li sha lopotwa kuyele, ngeno aafuthi mboka oya kwata. 

Taku hokololwa kutya aafuthi mboka ope na gumwe gwomuyo e na okukala e na uuyelele kutya iimaliwa mbyoka ohayi falwa kombaanga uunake nethimbo peni nookombaanga yini, oshoka kape na ombudhi hayi thimbula kutya mohauto omu na iimaliwa.

Shikongo okwa li a pula oshigwana shi longele kumwe nopolisi ta ti ngele osha mono uuyelele wu na sha neyugo ndyoka, nashi kale sha kwatathana nopolisi yi li popepi. Opolisi natango oyi li molukongo.


Staff Reporter
2019-09-05 07:37:30 2 months ago

Be the first to post a comment...

You might also like...