• March 20th, 2019
Login / Register

King Tee Dee a tseyitha oshituthi she shomainyanyudho oshitiyali



WINDHOEK-Mokuninga oongalo tadhi tungu, nokugandja omainyanyudho ga kwata miiti, King Tee Dee okwa tseyitha oshituthi she shomainyanudho oshitiyali, shoka a ti otashi ka ningwa moshilando muSepetemba twa taalela. 

Martin Morocky ngoka a li a tseyika nawa nedhina The Dogg, nongashingeyi oha ithanwa King Tee Dee okwa tula uukuni kumwe nehangano lyoPoiyah Media, mokulongekidha oshiingingili shika shomainyanyudho ga nuka po, kwa li sha tseyithwa pambelewa ehuliloshiwike lya zi ko moshilando.

Oshituthi shika okwa tengenekwa tashi ka nana engathithi lyaaholi yoongalo yaadha po 20 000, sha landula shoka shomvula yaziko sha endele nawa nokwali sha longekidhwa nawa. Uutekete woposheelo owa tameka nale nokuli oku landithwa, nouli pomwaalu guli pokati koodola dha Namibia 50 sigo 500.

Ilke Platt omutotipo gwehangano ly Poiyah Media okwa popi tati ye okuli anyanyukwa oku longela pamwe na King Tee Dee oku etapo oshiindingili shika sha nukapo. Okwa gwedhapo ishewe tati kakele oku taandelekitha uunongo waahikingalo mboka taya ka imba noku ulika uunongo wawo uusiku mbuka, oshituthi otashi gandja ishewe ompito ombwaanawa kaanangeshefa  mpoka taya ka landitha iipindi yawo esiku olyo tuu ndika.

Ehala mpoka tapu ka dhanenwa oshituthi shika otali ka tseyithwa komasiku gokomeho.
Pethimbo lyetseyitho lyoshiindingili shika, King Tee Dee okwali apopi kombinga yiinima mbyoka taka ninga omvula ndjika, moka mwakwatelwa nkene onkalamwenyo ye aihe tayi ka ulikwa koDStv, kopolohalama yoM-Net.

King Tee Dee ngoka eli teshi enditha nawa nedhina lye epe, okuli ishewe a pititha okangalo ke oka tiyali. “Oongalo dhandje odhili tadhi taandele nawa, noshili pamuthika gwopombanda, nondiwete sha pumbiwa opo ndikale ndatseyika nawa kuuyuni auhe tashi pitile mopolohalama ndjika tayi popi kombinga yonkalamwenyo yandje,” King Tee Dee tati ngaaka.

King Tee Dee okuli ishewe apititha okangalo ke okape kedhina You, hoka taka popi kombinga yohole. Shika osha landula sho ali apititha ongalo yedhina One I Love takwathelwa ku Diamond Platnmuz, ndjoka ya li ya ningi ethimbo ponomola yotango koItunes.

Okwa popi ishewe kutya iinima ayihe otayi ka enda nawa kuye omvula ndjika, naaholi yoongalo dhe naya kale ya ilongekidhila oshindji. 
 


Pinehas Nakaziko
2019-03-08 15:13:49 11 days ago

Be the first to post a comment...