KATIMA MULILO – Lipaki zamuuso zeswanela kufa bupaki mwa muzeko okulubelwa kuba wabulengwami, wamuzamaisi wakatengo katolopo ya Katima Mulio, Raphael Liswaniso, libilaezwa kitaba yakuli muzamaisi nalumelezwi kukuta famusezi, kasamulaho litaelo zahae zakupikela tolongo kwande, zene samulumeleli kuhata kwaliofesi zakatengo katolopo ya Katima Mulilo, neli kwetisizwe ki Khuta ya Muatuli Yomunyinyani ya Katima Mulilo. Liswaniso nali fapumulo yafamusebezi yakapelezo mwanako yebato eza likweli zetalu, kasamulaho akulimbwa likoto zabulengwami, buputeleli, nikuloba mulao obona zalipeleko zamuuso, kasamulaho aku akalezwa kuli nafile peleko kasamulaho akulaelwa kusa eza cwalo kikatengo kakatalima sinca lipeleko.

Kono kukuta kwa Liswaniso famusebezi hakusika amuhelwa kamazoho amabeli kibabeleki kaufela bakatengo katolopo, kakuli buñata bwa bona babuza kuli kiñi hakutile famusebezi. “Litaelo zahae zakupikela tolongo kwande neli mutibela kuli asike aikopanya ni lipaki zamuuso, kono cwale ukayo beleka nibatu babaswana bao babangiwa kuba lipaki zamuuso, mi babañwi bakubona sebafile bupaki kuamana niyena, taba yeo ika konahala cwañi?” nekubuzize yomuñwi yana bulezi niba New Era yana salati kuzibwa. Nabulezi hape kuli katengo katolopo neka swanela kueza lipatisiso zakona, nikulilimanisa Liswaniso famusebezi kasamulaho akulimbwa likoto ki khuta. “Buka yakamaiso yakatengo katolopo iotolohile, nalimbilwe mulatu wabuputeleli ki khuta, kacwalo katengo katolopo nekaswanela kueza lipatisiso zakona nikumulilimanisa famusebezi,” nekubulezi paki.

Hana kupilwe ku alabela falitaba zeo, Muyemeli wa Tolopo ya Katima Mulilo, Georgina Mwiya-Simataa, naize katengo katolopo nekasina buiketelo kono kuamuhela Liswaniso kuli akutele famusebezi kasamulaho litaelo zene muhanisa kueza cwalo neli kwetisizwe ki khuta. Natolokile hape kuli katengo katolopo nekasika eza lipatisiso zene fumani Liswaniso mulatu, kakuli nibona balibelezi feela katulo ya khuta, mi hape habakoni kumuhanisa kukutela famusebezi haiba hasikafunwa kale mulatu ki khuta. “Katengo katolopo nekasika mufumana mulatu, kakuli lipatisiso nelisikazwa kuluna. Nelutilo zibiswa feela kikatengo kakatalima zalipeleko kuli basweli kubatisisa muzamaisi waluna, mi kuzwa cwale lulibelezi kubona kuli balutolokele kuli sesilatelela kisikamañi,” nabulezi.

Litaelo zakupikela tolongo kwande za Liswaniso neli kwetisizwe niha sikwata sabatu babafitelela mianda iketalizoho bane basalati kuli apikele tolongo kwande, nebanyatezi liñolo la lipilaelo lene batambekile kumuzekisi wamuuso. Mwaliñolo leli swelwi kiba New Era, sikwata nesibulela kuli haiba litaelo zakupikela tolongo kwande inge likwetiswa mi alumelelwa kukutela kwaofesi, “uka silinga nikupata bupaki bobu mubeya mulatu, bobufumaneha mwaliofesi kaufela.” Liswaniso uka kutela kwa khuta la 27 Yowa 2019.