• December 5th, 2020
Login / Register

Langeleni komauta aafuthi otaya nyangele okili


Victoria Kaapanda

Sho omasiku gomatango omanene taga adha, uufuthi otau lundu na unene eteyo lyomagumbo neyakulo lyuundjato ndjoka lya indjipala.
Okwa konekiwa kutya iiningwanima yoludhi nduka ohayi indipala uenene sho kuukiwa poKrismesa nomumvo omupe, mpoka oongeshefa nomagumbo ogendji haga teywa, aantu haya yakulwa uundjato wawo ngele taya zi moombaanga noongeshefa hadhi yugwa kwa homatiwa. 

Yimwe yomiiningwanima mbyoka oya lopotwa mehuliloshiwike lyazi ko, moka opolisi moshitopolwa shaShana yi li molukongo lwaafuthi mboka ya ponokele oombelewa dhUuministeli woohi noonzo dhomefuta mOngwediva, eta dhi matuka po niinima yongushu yapita poN$50 000.
Omupopiliko gwopolisi moshitopolwa shaShana Thomas Aiyambo okwa ti, oshiningwanima shoka osha holoka koongula dhOsoondaha ya ziko lwopotundi 04h00. “Aafuthi mboka ya li ya ponokele oombelelwa dhoka, anuwa inaya moniwa komukeeleli gwomaliko, ngoka a li miilonga uusiku mboka. Ethimbo a li a uvu taya inyenge osho taya tondoka po nale,”Aiyambo ta hokolola.

Ta ti, anuwa omukeeleli gwomaliko ngoka ineya mona kiipala, a vule okuya dhidhilika nokuyakoneka. Ta ti okwa li owala amono mokahuto moka ya tondokele okaSadan.

“Otaku hokololwa kutya okahauto ka wo oya li ye kathigi mo milema, no ina vula okukoneka olwaala oshowo okukuthako onomola yohauto,” Aiyambo a popi ngaaka. Aiyambo ta ti, aafuthi mboka okwa li yatete odhalate yokonima yetungo, okupita ya ye meni lyohofa, etaya tatula omakende goombelewa dhili ine, moka mu yimwe yakutha iinima mbyoka.

Ta ti, omwakuthwa okompiyuta yopeke yongushu 13 500, ongodhi yetemba yoSamsung N$ 8 000, ongodhi yopeke N$ 4 500 oshowo iikwamashina yilwe yongushu N$ 2 000.

Otaku hokololwa kutya aafuthi inaya vula okuya meni lyetungo  nonaando okwa li taya kondjitha okuteya. 
“Sigo onena kapena shoka sha monika po, na kehe ngoka ena uuyelele kombinga  yoshiningwanima shika nalopotele opolisi yi li popepi naye,”Aiyambo ta ti ngaaka. Oshingwanima shafaathana, ositotola yedhina Team Training and Management  mOngwediva oya ponokelwa koombudhi, eta dhi fadhuka po niinima yongushu N$ 70 000 Olyomakaya ga ziko. Otaku hokololwa kutya oshiningwanima shoka osha holoka uusiku, no wili inayi konekwa. 

Aiyambo ta ti, ka kwa li tapu vulu okudhidhilikwa oompadhi dhi landulwe oshoka  okwa li kuna omvula tayi loko.Omwakuthwa Ookompiyuta dhi li ine, okompiyuta yopeke, ethano lyokuthaneka, niikwamashina yimwe oshowo imaliwa N$ 760. Opolisi otayi kumagidha oshigwana kaashilande iinima ya yakwa, oshoka kehe ngoka taka adhika nasho naye otamangwapo kopolisi. Tayi indile moshigwana  kutya kehe ngoka taka mona aantu taya landitha iinima yomaludhi ga fa mpoka momapaandanda naya lopotele opolisi. Oshiningwanima inaashifathana opolisi moshitopolwa shaShana oyi li molukongo lwohauto ya yakwa pegumbo mOndangwa. Aiyambo  ta ti, ohauto oya undulwa pegumbo ethimbo lyuusiku. Ta ti, mwene gwohauto okwa li eyi dhimbulula sho amono  kutya ohauto ye kayi li mpoka a li eyi thigi, okupendukila Osoondaha, molukanda Omashaka.

“Ohauto ndjoka oToyota Corolla osiliveli , yonomola N 190313 W, yongushu N$ 30 000,” Aiyambo ta ti.
Aiyambo okwakumagidha oshigwana shi kale sha kotoka pethimbo ndika lyomvo tagu yi pehuulilo, oshoka oombudhi odha pimbila.
Ta ti, omahala naga kale gena aakeleli noongodhi dho polisi adhihe, opo ya mone omakwatho go meendelelo.


Victoria Kaapanda
2020-11-17 14:33:18 18 days ago

Be the first to post a comment...