• September 24th, 2019
Login / Register

Medipark a konaakona aantu ye vule 390 oshali



Victoria Kaapanda

ONGWEDIVA-Oshipangelo shopaumwene, Ongwediva Medipark, osha tumu aakwashigwana ye na osuuka oshowo ombinzi ya londa ya ka mone epango kiipangelo, aantu mbaka oye vule pomwalu 390, sho ya li ye ya tutsu oshali shamuhongi ethimbo lyomawuliko giipindi mOngwediva oshiwike sha zi ko.

Princess Vicky Shikomba okwa li a lombwele Kundana kutya  elalakano lyokututsa aakwashigwana oshali mehala ngashi ndyoka lyomawuliko giipindi oshoka ohamu udha aakwashigwana oyendji unene mboka ye na omikithi dha yooloka ihe kaye na ethimbo nenge kaye hole okuthika kiipangelo.

“Aakwashigwana otwe ya kondo omagulu opo ya tseye nokukaleka po uundjolowewele wawo, oshoka oyendji yomuyo mboka ya li ya tutswa noya li ya monika omukithi gwosuuka nenge gwombinzi ya londa okwa li oshikando shotango okututswa, kokutya oshigwana inashi patuluka natango kashi uviteko uuwanawa wokututsitha omalutu gawo komithkithi dha yooloka ngaashi ndhoka oshowo okankela,” Shikomba ta ti ngaaka.

Ta kumagidha aakwashigwana ta ti osha simana okutseya omikithi dhi li molutu oshoka ngele uuvu  tawu holoka ihawu ti ndeya, oto mono ashike togu wu li mokati kaantu nando to dhilaadhila kutya ino iyuva nande to ehama, ihe ku shi kutya owu na omikithi dhini ndhoka tadhi ku pe omadhidhiliko ge li ngaaka.
Oshidhigu ngele omuntu a monika omikithi ngashi ndhoka kwa toka oshoka iha kala po nawa nuupu. Ano aakwashigwana naya thikame opo ya kale ya thika piipangelo yopopepi opo ya ka minikilwe nokututswa omikithi dha yooloka momalutu gawo.

Selma Nghihepa ngoka a li e na okatala ko kulanditha iikwamagadhi yokunika nawa momawuliko giipindi okwa ti okwa monika ombinzi yi li pevi ihe okwa li a nyanyukwa oshoka kakwa li u uvite ko kutya osha nika oshiponga okumonika ombinzi yi li pevi, ta ti nani kasha li mondjila.

“Okwa li tandi imemeha tandi yolitha omupangi ndi uvite nawa, andi mu lombwele tandi ti onda li nda tila nani ombinzi yandje oyi li pevi nawa, omupangi okwa li a kuutumbike ndje nokufatulila ndje kutya kasha li nawa nokashi li mondjila otashi vulu okudhipagandje, onkene onda pumbwa koshipangelo meendelelo”, Nghihepa ta fatulula.

Ta ti oyendji kaye uvite ko omikithi ndhoka, oshihwepo okuthika kiipangelo ya ka fatululilwe nokupewa omalongo, nkene gumwe e na oku ihumba momikalo  dha yooloka uuna a monika omikithi dha tya ngaaka. 


Staff Reporter
2019-09-05 07:35:51 19 days ago

Be the first to post a comment...