• November 17th, 2019
Login / Register

Meme Lydia Ipangelwa ota pangele oombasikela



Victoria Kaapanda

ONGWEDIVA-Iilonga yokupangela nando ya kala ya simanekelwa unene aalumentu, meme Lydia Ipangelwa okwa ti ka pe na oshilonga shokomake tashi longwa komulumentu tashi nyenge omukiintu.

Ipangelwa, 37, oku na ongalashe yoombasikela, oha pangele oombasikela molukanda Oneshila mOshakati. Ongalashe ndjoka ye mwene tayi ithanwa Okamukuku Bicycle Repair.

“Oyendji ngele tandi ya lombwele kutya ongame mwene he pangele oombasikela ndhoka dha teka, ohaya tsitha ndje ombata, ashike ohandi longo ashike ongame awike. Mesiku ohandi vulu okupangela oombasikela dha pita pomulongo,” Ipangelwa ta ti ngaaka.

Ta popi ta ti ye mwene okupangela oombasikela ine ku ilongela kosikola yontumba, ye ine ku lala nando ondjodhi, ashike okwe ya ashike onge epakumo lyeho.

Ta ti ye tango sho a tameke iilonga pOkamukuku Bicycle Repair okwa li e ya po onge omukwathi gomombelewa ihe sho a kala ha tumwa iipangelithi yi ili noyi ili kaaniilonga aakwawo, okwa ende te yi tseya.

Ta ti okwa ka mona ashike ha ithanwa a ka kwatele gumwe ngele pe na ompumbwe, nani ontseyo otayi ende ya uka pombanda.

Ipangelwa ta ti okwa mono ashike ha thigwa po oye awike nongele pwe ya okasitoma, ihe kape na ngoka ta vulu okukwathela, okwa tameke ha kwathele.

Ta popi nenyanyu aniwa nena kape na shoka kee shi kombinga yokupangela oombasikela, ta ti ke wete tashi mu pula ethimbo oku eta po ombasikela kuye mwene.

“Aanilonga yakwetu mboka kwa li nda adha mo mOkamukuku Bicycle Repair, oya ende taya zi mo koogumwe noogumwe, yamwe oya mona iilonga yilwe sigo nda kala mo ongame andike. Omuhona gwandje naye okwa tokola opo kaa tsikile we nokupangela oombasikela. Inashi teya ndje omukumo, onda tokola okulonga kungame mwene, nonda kutha po ongeshefa ndjoka. Nena otandi popi nomukumo kutya ongalashe ndjino yoombasikela oyandje mwene,” Ipangelwa ta yelitha.

Ta popi ta ti omimvo dha pita puhamano, ta longo iilonga mbyoka ashike okwe yi panda oshoka ina tsakaneka natango uupyakadhi muyo. 

Ookasitoma dhe uunene uunona wosikola oshowo aasamane mboka taya ihilile muukokele, mboka ye uvite kutya ombasikela osho oshihauto shawo.

Ipangelwa okwa li a gandja omakumagidho kaagundjuka aakwawo ta ti: “omutumba ethete, po kape na oshiwanawa hashi zi pokapala ka yela,” ngele omunyasha a kuutumba megumbo nonzapo yi li kohi yokofa a tegelela iilonga yepangelo nenge yookaampani, oomvula otadhi ende ashike dhu uka komeho keehe na sho a likola. “Kashi na sho tashi kwathele. Shi vulithe wu nyangadhalale naashoka to vulu oku eta po.”
Ta ti okwa itaala kutya kehe omuntu okwa pewa oshitalenti kuKalunga, ashike haayehe haye shi longitha ihe ngele to kambadhala naashoka to vulu owu na oku sindana.


Staff Reporter
2019-09-02 08:20:10 2 months ago

Be the first to post a comment...

You might also like...