• December 15th, 2018
Login / Register

MVA a ningile iihakanwa yiiponga oKrisimes



Victoria Kaapanda

ONGWEDIVA-Mboka kwa li ya lemanene miiponga yiihauto oomvula dha ka pita, oya li ya longekidhilwa oshituthi shaKrisimes kendiki ndyoka hali ungaunga niiponga yomoondjila,  Motor Vehicle Accident fund (MVA), shika osha li sha ningwa mehulilo lyoshiwike sha zi ko mOngwediva.

MVA okwa li a gongaleke ayehe ya li ya mono iiponga yiihauto yi nyanyaleka, ya dhanene evalo lyomukulli pamwe. Oya li ya zi kiitopolwa yi ili noyi ili, ngaashi Kunene, Oshana, Omusati,nOhangwena.

Omivo 15 MVA okwa kala ta dhana oshituthi  shokomvula kehe,nonuumvo ye li 81 oya li ya holoka okunyanyukilwa pamwe nonando ye na uunkundi mboka ita wu vulu oku ya thikitha ashike oya kambadhala sigo ya thiki opamwe namboka haye ya kwathele momayinyengo gawo.

Kehe gumwe okwa li a kalelwa po komuyakuli gwe oshoka mboka ya li ya longekidhilwa oshituthi shoka oomboka ashike ya li hupu miiponga mbyoka yi nyanyaleka, no ihaya vulu okukala kuyo yene nenge oku ikwathela yo yene.

Omuwiliki gwoshituthi oshowo omunambelewa gwelongo moMVA Fund, Victoria Amutenya, ngoka naye  ali a hupu moshiponga shohauto okwa li a kumagidha ayehe ta ti naya pandule Nampongo oshoka natango oye li momwenyo, no itashi shi ti ngele oye li kokatemba nenge oya kanitha shimwe sho millyoyomalutu gawo, onkalamwenyo oya hula.

Amutenya ta ti etompelo lyoshituthi shoka okunyanyukilwa pamwe, okugandja omalongo nkene ye na okwiihumbata  nokugandja omawupyakadhi ngoka ya taalela opo ga kandulwepo oshowo oku ya uvitha ohole kutya natango oye na oshilonga monkalamwenyo.

“Kehe gumwe na kambadhale naashoka ta vulu okuninga, MVA ota kwathele ashike ngele mwa ningi omayindilo geni,  ngame ondi li tandi igwedheleko mushimwe shomiiputudhilo nonando ihandi vulu okukwata opena okushanga ihe, okwa li nda ningi eyindilo koMVA fund opo ndi kwathelwe ndi ningilwe okashina kokunyala opo ndi vule okushanga, ihe nena otandi shi enditha nawa miilongwa yandje” Amutenya ta ti ngaaka.

Ta gwedha po ta ti oku uvite kutya ope na mboka kwa li ya mono iiponga yoohauto oomvula 30 dha ka piti ihe inaya patelwa kondje okuwatelwa, ashike, ngele ope na ngoka e li monkalo ondhigu itayi vulika, ope na omakonakono ngoka haga ningwa po opo a vule okupewa ekwetho.

“Mboka taya kwathelwa koMVA fund oyo mboka ya mono iiponga yi nyanyaleka, niiponga mbyoka onge ya holoka ethimbo lyokatendo okape, ihe kayi shi yoomvula 40 dha piti”Amutenya ta yelitha.

 Omukuluntumugandji  gomawuyelele mombelewa yaMVA Fund Liinekela Shipindo, okwa li a popi ta ti oyendji oya sholola mo onkalamwenyo dhawo  oye wete kutya kaye na we oshilonga oshoka oya kanitha yimwe yomiilyo yolutu lwawo, ihe ota ti ehungomwenyo ewanawa ngele ye li tula miilonga ngele ye li uvu ko.

“Mbaka twa li twa ithana ye ye ya lye evalo lyomukulili nena mpaka oomboka ya mono iiponga yi nyanyaleka, ihaya vulu oku enda , ya teka omagulu, ya teka oombunda nenge ihaya vulu nando okwiinyenga shapo ongele ya taya inyengithwa kaayakuli yawo”, Shipindo ta ti ngaaka.

Shipindo okwa li a gwedha po ta ti mboka inaya vula okuthika medhina lyuunkundi, ota ye ke   yaningila Okrisimesa pomagumbo gawo.

Omupolisi mOndangwa  Wilbard Tobias  okwali a gandja ehokolo nkene a kambadhala sigo a sindana omanga e li kokatemba.

Tobias ta ti okwa li a mono oshiponga shohauto mo2015 moka a li tekele ombunda ye. Kakwa li oshipu oshoka okwa li a sholola kutya ke na we  oshilonga oshoka ita vulu oku enda noondohotola osho dha li dhe mu lombwele, tati okwa li a mono ehungo mwenyo ndyono lya li lye mu pe omukumo lela.

“Ehungomwenyo okwa li lya kwathelendje oshoka onda ka mona omukumo, ihe tandi ningi eyindilo lyomopolisi moka kw ali nda zimo. Omadhewulo ngoka kwa li taga ningwa kukehe gumwe nangame ogo wala kwa li te pewa , kakele kwaangoka ge na sha nombunda shaashi itayi vulu ashike onde shi pondola oomwedhi hamano adhihe”. Tobias ta ti ngaaka.

Ta kumagidha ta ti oha longo onge omupolisi paife, ihe okwa li ndi wete kandi na shilonga , ta ti ina ya sholola nando siku limwe ashike otaye ke shi pondola ashike.


New Era Reporter
2018-12-07 12:17:46 8 days ago

Be the first to post a comment...

You might also like...