• November 16th, 2019
Login / Register

Nakudhipaga okanona okwa ninga ethimbo ta ningile aatekulu iikulumanane....Sho owala a pitithwa mondholongo kesilohenda, okwa kambadhala okukwata okanona kamumwayina koonkondo, okwa ehameke po kamwe, niikwawo oyindji… nolwahugunina ta dhipaga po kamwe nekuya



WINDHOEK- Nonande oshigwana oshi li sha thigwa neikwato pomutima nokuhaluthwa koshiningwanima shoka sha longwa komulumentu gwomimvo 37 sho a dhipaga omutekulu gwe gwoomvula ne mOmaandaha gwoshiwike shika, aakwanezimo oya ti nguka okwa ninga oonkambadhala odhindji okulongela aatekulu ye omiyonena.

Fillemon Muvomupe Timoteus okwa adhikwa owala opo a yi komukunda gwaandjawo kOmbele –Iikokola moshitopolwa shaMusati, a zi kumumwayina kOvenduka ngoka a kala miikaha ye sho a egululwa mondholongo kesilohenda, konima yoomvula omugoyi omolwoshipotha shekwatokoonkondo e shi ningile mo2007. 

Omumwayinakadhona gwanakudhipaga ngoka e li osheeli shawo ngoka a ningi omutekuli gwe mOvenduka sho yina  a hulu ko okwa hokolola kutya omufekelwa okwa ninga oonkambadhala odhindji okulongela uutekulu, wa valwa kaamwayina uuwinayi iikando oyindji.

Sarti Iyambo ngoka e li omukuluntu gwayakwawo okwa hokolola kutya ye okwa ninga oonkambadhala iikando oyindji okukala a popya nofamili ye opo andola Timoteus a hungwe omwenyo. Shika Iyambo okwe shi ningi sho a li a adhelela mumayinamati ngoka ta ningi onkambadhala yokukwata okanona ke kokakadhona koonkondo maandja Iyambo mOvenduka. Shoka ishewe tashi halutha mehokololo ndika ooshoka kutya sho ashike omutamanekwa nguka a thiki megumbo lyawo moka okwa thikila nale a dhenga okanona kamwe e ka ehameka, noku ka ninga iilalo, ee taka yi moshipangelo noke li ngashingeyi taka mono uuhaku, haka ka mangululwa.

“Sho ashike nde ya londodha inapu pita omasiku okanona kamumwamemegona oka dhengwa nokweehamekwa komuntu nguka. Otwa dhengele opolisi opo yi ke ka tale ye ka fale koshipangelo, ye ngeno a mangwe po, ashike omupya omunene nakuhinga ohauto yopolisi ehala ka li e li shi nawa onkene okwa dhenge ashike ongodhi opo omunona a falwe popepi nopate mpoka ta vulu okumona. Osha li nee oshidhigu opo nguka a mangwe po,” osho a hokolola ngaaka omanga a nika uupongo.

Okwa hokolola kutya opwa piti ashike omasiku ge li gatatu konima sho Timoteus a ehameke okanona kamwe, ye ota adha okanona hoka ka ningi oshihakanwa she sha hugunina ke li megumbo oko akeke ka thigwa mo kuyina omanga a ya puundingosho.

“Okwe mu dhenge nekuwa aniwa sigo omeso lye. Okuza mpoka okwa yi puundingosho mboka wu li popepi negumbo e ta lombwele yina yokanona, kutya okanona ke omo ke li mondunda oka mona oshiponga onkene na ye kuko meendelelo. Yina yokanona naye omumwameme,” osho a hokolola ngaaka.
Ashike Iyambo okwa longitha ompito ndjika kutya ofamili oya pumbwa ehungomwenyo oshoka Timoteus okwa ninga iinima oyindji iiwinayi komeho yawo noomwenyo kadhi li pomahala nomadhilaadhilo oga haluthwa koshiningwanima shika sha huguninwa.

“Nena ndjika oko nda li kuye kondholongo hoka ashike omeho ngoka nde mu tala kaga li omapu. Itandi vulu oshoka ote tu kutha unene oongudhi dhokomongula mezimo lyetu. Sho nde mu pula okwa hokolola kutya ye oku na ashike oshinima momwenyo gwe shoka tashi mu lombwele kutya na ninge iinima iiwinayi.
“Okwa hokolola woo kutya aniwa ayihe mbyoka ta ningi ote yi ningi oshoka ota nana ezimo.

“Mumwameme sho a putuka ka li naanaa omuntu ngeno omwiinayi ashike uuwinayi we owa tameka ngaa okuza poomvula 2007 lwaampoka sho a li a longo oshikulumuna shekwatonkonga. Okuza mpoka okwa li a yi mondholongo ashike mo2016 okwa lalekwa mo kesilohenda,” osho Iyambo a hokolola ngaaka.
Okwa hokolola kutya konima sho Timoteus a silwa ohenda ee ta egululwa mo mondjendililo, okwa tameke nokuninga oonkambadhala odhindji okumonitha uunona uushona iiponga noku ya longela omiyonena ashike olundji okwa ka kala a lungamenwa nuunona ihawu thigwa mo we megumbo kaapu na etonatelo lyomukuluntu.

“Okwa kala nduno ta kondjitha a ye kOwambo ihe ngame onda kala nde mu keelela ko oshoka okwa li e na oshimpwiyu shokukala ta ilopota kondholongo yaVenduka. Onkene nduno omasiku nga ga zi ko okwa mono po nduno uulonga uushona mboka we mu monitha okamaliwa opo a vule okuya kOwambo,” Iyambo ta ti

Okwa ti okwa kala ethimbo ele e mu kutha uuthemba we awuhe opo kaa ze mo meni lyondoolopa oshoka okwa mona nale omikalo dhe tadhi limbilike.

“Ashike sho a futwa nduno okamaliwa ke hoka a longele okwa pula ndje nduno ndi mu pe okambomba ke oshoka oku na oshimaliwa she shoka a longela. Sho ashike nde mu pe okambomba hoka okwa yi ashike koWoerman Brock hoka a ka landa oothewa dhe. Sho a zi ko okwa lombwele ndje ashike kutya ye ota yi kOwambo. Kapwa li pu na ethimbo lyoku mu keelela ko oshoka okwa popya nangame muule wokathimbo okashona,” osho a hokolola ngaaka a lulilwa.

Iyambo okwa popi kutya ye okwa ninga woo onkambadhala okufala mumwayina nguka a ka hungwe omwenyo ihe ofamili oya kala yi na omananathano taya ti kutya shoka otashi ka eta ashike omuntu a shunithwe mondholongo ishewe.


Loide Jason
2019-06-21 12:54:55 4 months ago

Be the first to post a comment...

You might also like...