• August 15th, 2020
Login / Register

Namibia a hala omitopelo dhoondjembo dhi hulithwe po



Omupevipresidente gwaNamibia Nangolo Mbumba okwa ti niilongo yaAfrica nayi nkondopeke omikalo, oondjila osho wo omahangano onga omukalo gwokunkondopeka okulela osho wo okukwashilipaleka kutya Ongongahangano yIigwana yaAfrica (AU) otayi vulu okuyamukula komakuyunguto. Ta popi pomutumba omu-33 gwIigwana yaAfrica mehuliloshiwike, Mbumba okwa kumika opo Ongongahangano yaAfrica yi dhane onkandangala mokuhulitha po omakuyunguto menenevi. “Otu li pompito onene nayi. Oomvula omulongo dha pita, otwa li twa popi kombinga yompumbwe yokuhulitha po omitopelo dhoondjembo sho taku ka thikwa mo2020. Omumvo 2020 ogwa thika nonkatu ndjika inatu yi adha nantango,” Mbumba ngoka a li a kalela po president Hage Geingob ta ti,

“Ngashiingeyi ope na nokuli omaipumomumwe ogendji shi vulithe nale. Otandi dhilaadhila tu ipuleni kutya openi mbela twa puka nashike mbela shoka inaatu ninga sigo oompaka, oshike inatu longa shi li mondjila; tu na ehalo lyokuhulitha po omitopelo dhoondjembo.” Omutumba nguka gwoAU ogwa dhama mokukandulapo omakuyunguto menenevi, unene uukulo, omaipumomumwe giigwana osho wo omakuyunguto haga holoka komeho nokonima yomahogololo. “Oontotwaveta dho-AU otadhi tu puleni atuheni opo tu kandulenipo omashongo ngoka taga tengaatengitha ombili menevi. Shika oshinakugwanithwa oshinene, shoka tashi pula opo tu kale twa itula mo momalalakano getu. Inatu dhimbweni kutya omakuyunguto kwa homatiwa ohaga yonagula oonkalamwenyo dhaakiintu, uunona naalumentu, osho wo ondjuulukwe yawo yombili, okuya komeho neyambulepo oyi li komapepe getu,” osho omupevipresidente a ti ngaaka.

Ta popi wo konkalo ombwiinayi yokoLibya, hoka oonkundathana dhombili pokati kepangelo nomukuluntu gwetanga lyaakwiita dha li dha hulu mOlyomakaya ashike inaya tsa ya thithe. Shika osha eta iikolokosha yi tsikile.
 “Lwahugunina opo ku kandulwe po uupyakadhi waAfrica nokutala onkalo yaLibya, naku tulwe miilonga iizemo yOmutumba gwaBerlin ngoka gwa li ko momasiku 19 Januali 2020, osho wo gwaBrazzaville gwomomasiku 30 Januali 2020,” Mbumba ta ti ngaaka.


Kuzeeko Tjitemisa
2020-02-11 07:52:25 6 months ago

Be the first to post a comment...

You might also like...